Referral Hospital din tumna sumin hospital tur a daih lo – Zoramthanga

MNF sawrkar hmasaah sawrkar laipui atanga cheng vaibelchhe 40 an hmuh hmangin Referral Hospital din an rel a, damdawi in building leh medical quarters a daih chin chin an sa a, hospital chu a taka kalpui turin sum hian a daih ta lo tih chief minister Zoramthanga chuan a sawi.
August 7 kha Zoram Medical College/ State Referral Hospital din a nih champha vawi 5-na a ni a. A hmuna lawmna inkhawm hmanpuitu chief minister chuan ZMC pian dan kawng a bumboh hle tih sawiin, a tirah central atangin vaibelchhe 40 an dawng a, Referral Hospital sak an rel a, sawrkar laipui atangin a umzuina beisei tur a awm tawh chuang lo tih a sawi.
“A hmun ngaihtuahin kan inrawnkhawm a, hun rei zawka la thanglian zel tur a nih hre chungin Falkawn kan thlang ta a ni. Kan sum neih khan damdawi in building leh quarters a daih chin chin kan sa a. Referral Hospital chu a taka kalpui turinsum kan nei zui ta si lo a; hun rei tak a khaihlak ta a ni. A hnuah MIMER tiin chhunzawm a lo ni leh a, kan hriat angin kum 5 kalta vawiin angah khan a lo ding tan tak tak ta a. A hming erawh mi nawlpui tana lam awlsam zawk turin rawtna tam tak zingah ZMC tih kan thlang ta a ni,” a ti.
Hmathlir fel tak neia hmasawnna hna kalpui a ngaih avangin a tira hmathlir thui tak nei chunga Falkawna an lo dah chu a fuh em em tih chief minister hian a sawi a. Hmathlir fel tak neiin MINECO pawh an din bakah chutiang zelin thildang dangah pawh hmathlir fel tak zarah hmasawnna duhawm tak tak an hmu zel dawn tih a sawi.
Covid vangin sawrkar laipui atanga hmasawnna hna an thawh vena tur sum lokal tura beisei, lo kal thei ta lo phurrit phur chungin, kan mamawh em em ZMC-in hma a sawn theihna’n sum an ngaihtuah hram hram thin tih a sawi bawk.
Health minister Dr R Lalthangliana chuan recognition inspection neih laiin ZMC chu Covid Dedicated Hospital atan hman a ni a, chuti chung chuan National Medical Commission chuan recognition a pe ta tho tih a sawi. Mizorama doctor indaihlohna nasa tak chu ZMC zarah reiloteah kan indaih thuai dawn tih sawiin, chutihrualin MBBS china lungawi mai loin, sang zawka kal zel a, ZMC ngeiin zirna sang zawk a kalpui huna faculty tha tak tak ni theia bei turin zirlaite a chah.
ZMC/SRH ah hian thawktu 723 awm mekin tunah hian MBBS zirlai batch 5 an awm a, zirlai 489 an awm. Batch tinah seat 100 awmin, chu’ng zinga 70 chu Mizoram state quota a ni a, a dang 15 chu All India quota niin, a dang 15 hi non resident Indian quota a ni. Batch hmasa berin kuminah final exam an nei tawh a, zirlai 95 an pass a, tunah internship an ti mek. An ni bakah hian foreign medical graduate 6-in internship an ti ve bawk.
ZMC hian hospital unit 19-ah khum 470 a nei a, casualty ah khum 20 awmin, ICU ah khum 17 a nei a, ICU khum 30 dang hawn belh thuai tum a ni. Operation theatre – major OT 10 leh minor OT 6 a awm a, zirlai 200 lenna library, mi 220 awm theihna Boys Hostel leh zirlai 260 awm theihna Girls Hostel, thawktute quarters 225 bakah khawl tunlai ber ber hmanga thuam a ni a, research project peng hrang hrang 14 an kalpui mek bawk.