Rel kawng siamtute thir miin an rukbo sak nasa

Mizorama rel kawng siam mektute hmanrua – thir chi hrang hrang chu mi tu tih hriat loh ten an rukbo sak nasa thin a, rel kawng, a bikin lei dawh hoin an tawrh phah a hlauhawm thei hial dawn tih an sawi.
Northeast Frontier Railways general manager Chetan Kumar Shrivastava leh a thawhpuite chuan chief minister Lalduhoma chu Thawhlehni khan a office-ah an kawm a. Bairabi leh Sairang inkara rel kawng siam mek an sawipui.
Chief minister hian nikuma Sairanga chhiatna an tawk kha pawi a tih thu a lo hrilh a, an hnathawh mekah harsatna an neihte a hnena thlen thin turin a chah. Sairang Rel Station-ah RoRo system (roll on roll off) awm thei se a duh thu leh a taka rel a lo thlen hunah ram leilungfa a tam thei ang ber hna thawka chhawr a duh thu a lo hrilh a ni.
NF Railways hotu hian Mizorama an rel kawng siam mekah an thir chu misualin an ruksak nasa hle tih a sawi a. Hetiang hi state dangah a thlen ngai pawh an hre lo tih sawiin, “Gas hmangten min cut sak a, kan bolt leh bearing te a bo nasa a, lirtheite rawn kengin an phur chhuak hial thin a, kan mangang hle,” a ti.
Hetiang reng a nih chuan lei (bridge) tam tak khu chhiatna nasa zawk tawk thei an ni, tiin, rukrute avanga an harsatna a thlen a. Rukruten an thil an ruksak hnu thlalak thahnem tak chief minister hi a entir. FIR an thehluh thin thu a sawi bawk. Bairabi to Sairang rel kawng hi nakum July-a zawh hman an inbeisei a ni.