Rel station-a kangmei chhuakah lirthei 200 chuang kang chhia
Rel station-a kangmei chhuakah
lirthei 200 chuang kang chhia
Kerala-a Thrissur Railway Station-ah Pathianni khan kangmei nasa tak a chhuak a, a bul chiaha lirthei ke hnih nei hunna tur hmuna hun 200 chuang a kang chhia.
Kangmei hi Platform No. 2 bula lirthei ke hnih nei hunna hmun atanga chhuak niin a bul hnaia awm leh chengte a tiralkhel nasa hle.
Chhui zuina atang chuan kangmei chhuak hi zing dar 06.45-ah hriat tan a ni a. Rang takin lirthei hunna hmun hi a man kai nghal a, he hmunah hian ni tin motorcycle leh scooter 500 chuang lut leh chhuak ziah ang a ni.
Lirthei hunna hmun a man kai hnuah hian lirtheia tuialhthei nen a inman kai chak zual a, hun rei lo tak chhungin chhiatna nasa tak a thleng zui nghal a. Fire & Rescue Services-in an hriat veleh a hmun hi pan nghal mah se chhiatna lian tak a thleng hman ta tho a ni.
Kang thelhna hmanrua thahnem tak leh thelhtu tam tak nen darkar khat dawn chhungin an thelh mit thei a. A kang hi an tihmih hnuah pawh a khu erawh a la nasa hle a, station-a thawk leh veivak tan pawh awm ngaihna awm lovin hun eng emaw chen chu a awm a ni.
Thil thleng hmutute chuan lirthei thenkhat chu a kang chhe vek a, thenkhat erawh kang chhe nel nual a ni thung niin an sawi a. Lirthei neitute hi ni tina he hmuna hunga kalsan thin an ni tlangpui a, hmanhmawh takin an tlan khawm a, eng zat chiah nge kang chhia leh a hlut zawng hi thuneitute an chhut mek.
Kangmei chhuah chhan hi hriat a la ni lo va. Thuneitute chuan an chhui thuak tawh chinah chuan electrical short circuit, tuialhthei put leh thil dang vang pawh a ni vek thei tih an sawi.
CCTV-a video lak atang chuan rel station hung chhung atanga inman kai pawh a ni thei em tih ngaihdan a awm theih a. Railway thuneitute chuan rel tlan vel chu kangmei chhuak hian a tibuai hran lo niin an sawi.
Lirthei hunna hmun hi relkawng bul hnaih taka awm a ni a, relin Guruvayur a panna kawng a ni a; mahse, pawi a khawih tam hmain thelh theih a nih hlauh avangin railway thil engmah chhia a awm lo hlauh a ni.
Rel hi dan pangngaiin a tlan chhunzawm thei reng a. Railway leh tual chhung thuneitute chuan lirthei neitute hnenah hian kangmei chhuah chhan leh pawi a khawih dan chu uluk taka chhui chhuah vek an tiam.
He thil thleng hian vantlang hmuna kangmei laka himna dan siam zam a hlawh tawk lo tih sawi thawm a rik rin thar zual phah.