Relief Sunday hmang

Mizoram Baptist Kohhran chuan Pathianni – June 18 khan tualchhung kohhran tinah ‘Relief Sunday’ an hmang a. Kumin thupui chu “Nangmahni’n ei tur pe rawh u” (Luka 9:13) tih a ni. Pathianni zing inkhawmah Headquarters leh tualchung kohhran relief rawngbawlna chanchin report leh thupui thlansa hmangin thuchah ngaihthlak a ni.
Kum 1966 chhoa Mizoramin Mautam tam leh rambuai a hmachhawn hnu ah, tihluihnaa khaw sawikhawm a nih laia Mizo mipui mangang laiin, India ram leh ram pawn thlengin kohhran kaltlangin chhawmdawlna an dawng thin a. Heng tanpuina dawnte hi mumal taka sem chhuah theihna tur leh kohhran pawhin mipui mangangte tanpuina tur thawhlawm (Relief Fund) a bika siam tha a ti a ni.
He chhawmdawlna rawngbawlna hi kohhrante thinlungah tuh thar zelin, kumtinin June thla Pathianni vawi thumna chu hemi pual hian Baptist Kohhran hian hman an rel ta a ni.
Chhawmdawlna hna thawk turin tunah chuan BCM Hqrs-ah chauh niloin bial leh tualchhung kohhranah pawh Relief & Development Committee din a ni ta zel a. Tangkai takin chhawmdawl ngaite chhawmdawl hna a thawk a ni.