Remna duh vanga IPS hna leh MP a nihna a bansan thu CM-in sawi

Mizoram chief minister Lalduhoma chuan remna a awm theihna tur a nih avanga police hna leh MP a nihna a chawlhsan thu sawiin, Thenzawl Peace City tihhlawhtlin sak ngei turin sawrkar laipui a ngen.
NITI Aayog chuan Zirtawpni khan New Delhi-ah hmarchhak chief minister leh chief secretary ho a kawm a. Chief minister hian, Thenzawl Peace City din tura hmalak mekna sawiin, Prime minister Indira Gandhi ngenna avanga remna hna thawk tura police hna a bansan thu, MP nihna a chawlhsan thu leh mimal taka a lo tawrh ve na hriatsak chunga Peace City hmasawn zelna atan theihtawp chhuahpui turin a ngen.
Mizoram tan ‘All India Service (AIS)’ cadre hran neih a tul dan leh a pawimawhna a sawi a. Hemi chungchangah hian Arunachal Pradesh chief minister Pema Khandu nen pawh hma an la dun tih sawiin, state hmasawnna atana cadre hrang neih dan leh a hlawkna tur an sawi a ni.
Chief minister hian NITI Aayog member atana hmarchhak mi Dr Joram Aniya ruat a nih avangin lawmthu a sawi a. Tinzawn neia hmarchhak state hruaitute tana thutkhawm an buatsaih chu tha a tih thu a sawi.
Inkawmhonaah hian NITI Aayog CEO Nidhi Chhibber chuan inlawmna thu a sawi a; vice chairman Ashok Kumar Lahiri chuan hetiang hun an buatsaih chhan leh an ngaipawimawh thil a sawi a ni.
Mizoram CM thusawi dang:
8 High Level Task Force on Northeast Economic Corridor-a convener a nih angin, Thailand thlenga kal tur India- Myanmar- Thailand trilateral highway chu tihhlawhtlin thuai a tul tih a sawi a. Kaladan Multi Modal Transit Transport Project pawh tikhawmuang tawh loa, a hun taka zawh tha a tih thu a sawi.
8 Aspirational Districts and Aspirational Blocks Programme hnuaia hmarchhak bial, a bikin Mizorama a huamchin ennawn a tul tih a sawi a. Tuna hman mek tehfung hian tlangram leh ramri hrula awm state-te dinhmun dik tak a pho chhuak tawk lo tih a sawi.
8 Hmarchhak state tana sawrkar laipuiin 10% Gross Budgetary Support a duan chu a nihna ang taka state ho pek a, state sawrkarin scheme a duan leh hmasawnna hna pawimawh bik thawhna atan hman theiha siam a tul tih a sawi.
8 Centrally sponsored schemes inkaihhruaina sawiin, Northeast-ah a nih ang anga hman rem lo tam tak a awm a, tlangram mila siamrem leh herrem a tul thu a tarlang a ni.
8 Tourism lama hmasawnna tur bakah Sports department hnuaia Empowering Mizoram Sports kalpui mek a nih dan leh hmasawn leh zelna tur a sawi.
8 Mizoram Ginger Mission hnuaia sawhthing sawngbawlna din tur tihhlawhtlin thuai a nih theihnan NITI Aayog puihna a ngen.