Remna Ni champha leh a behbawm…

Inrem lohna avanga kum 20 zet ram a buai hnuah, 1986 June ni 30-ah inremna a lo awm leh a. Mizoramin buaina a tawh dan rapthlakzia leh thawpikhlakzia hre pha lo tan chuan, remna a lo thlen hnua a thawventhlakzia leh a lawmawmzia hriatthiam a harsa deuh ngei ang. A taka buaina tawng pha ve chiah lote pawhin, ram buai dan chanchin rapthlakzia an hriatin, remna a lo awm hnua a thawventhlak turzia an chhut thiam tho ang a, mahse a taka tuartute ang em chuan an hrethiam pha lo ang.
Hetih lai hian, kha kan ram buaina tawng pha ve lo thangtharte hian, tuna kan thenawm state leh rama buaina chhuak avanga Mizorama raltlan lo lutte dinhmun an hmuh hian, remna leh muanna hlutzia an varpawh phah ve thei bawk awm e; remna leh muanna vawnhim a pawimawhzia an hriatthiam poh leh remna leh muanna hi an hlut thiam chho zel turah a ngaih theih ang a, chu chuan rah tha a chhuah zel a beiseiawm a ni.
Kan ram hruaitute pawh hian, he remna leh muanna hi changchawi in, sawrkar laipui hotute an dawr thin a, state dangin an dawn ve theih loh dawng bik anga sawi thawmte pawh kan lo hre tawh thin. Hmana kum 20 chhung ‘rambuai’ avanga Mizorama hmasawnna a thuanawp nasat dan te, a bik taka ngaihtuah kan tulzia te hi tun thleng hian ram hruaitute hian sawrkar laipui hotute dawrna karfung atan an la leklam reng a, hei hian remna leh muanna hlutzia a pholang nghal a tih theih bawk awm e.
Hetih lai hian, remna leh muanna changchawia Mizoram hmasawnna hnathawhna tura sum leh pai sawrkar laipui atanga kan dawn zozaite hi, kan chhawr tangai em, kan hmang tangkaiin hma kan sawn phah em? Eng tiang chiahin nge hma kan sawn phah tih lam hi kan inen let ve fo a pawimawh awm e. Sawrkar laipui hotute karfung atana ‘remna leh muanna’ kan leklam pah hian, an mi duhsakna kan dawnte kan hman tangkai dan leh hma kan sawn phah dante hi sawrkar laipui hotute hnenah hian engtin nge report kan pek ve thin reng reng le?
Mizoram sawrkar kal ta zawng zawng khan, Delhi tlanga an kal chanchin leh sum an haichhuah chanchin kha mipui hrilh chikah an nei thin a, mahse, hmasawnna atana an sum haichhuahte langtlang taka hman tangkai a nih dan lam erawh sawi chhuah a phurawm ta chiah lo thin em ni aw tihturin a awm thin.
Remna Ni champha kan lawm apianga, remna pual bika hmasawnna rotling pakhat tal sual chhuak thin turin ruahmanna siam thin ila, chu chu remna leh muanna hlutna symbol langsar tak a nih a rinawm.