Remna Ni Special Clinic

Aizawl District Chief Medical Officer (West) office leh Zoram Medical College chuan Remna Ni pualin Zirtawpni khan Kulikawn Hospital-a ‘Remna Ni Special Clinic’ an buatsaih a. Mipui tan Medicine, Skin, ENT, Pediatric, Psychiatric, Surgery, Dental leh Eye-ah inentirna hawn a ni. He hun hmanpuitu Aizawl South II bialtu MLA Lalchhuanthanga chuan Remna Ni a damlo inentir tura kalte tan he ni hi malsawmna a nih theih nan duhsakna a hlan tih a sawi a. A thawktuten hetiang an buatsaih thei chu lawmawm a tih thu a sawi. A bial chhunga health care centre hrang hrang a tlawh fo thu leh, tichangtlun ngai a nih deuh vek thu a sawi a. Kulikawn Hospital pawh hmunhma tha si, fianrial tha si, changtlung taka siam theih a ni, tiin, sawrkarin ngaipawimawh se, urban poor-te tan pan awlsam a nih avangin tihchangtlun tha a tih thu a sawi. ZPM a sawrkar chuan helai hmun hi changtlung taka siam a nih theihna’n hma an la dawn tih a sawi bawk.