State Assembly phalna loin UCC hman rem lo – Home minister

ndia sawrkar leh MNF inremna in a kentel, ram danpui article 371G hnuaiah Uniform Civil Code (UCC) hman a nih pawhin Mizoram bikah chuan State Legislative Assembly-in a pawmpui leh phalna telloin hman ngawt theih a ni ve lo tih Mizoram Home minister Lalchamliana chuan a sawi.
Zirtawpni-a Remna Ni vawi 38-na lawmna Keituma neih a hmanpuinaah Home minister chuan, remna ziah a nih khan India Constitution-ah article 371G telh a ni a, he article hian Mizo hnam leh sakhua damna tur thui tak a hril, tia sawiin, “Nupui pasal neih leh ro luah dan tur chungchangah UCC hman a nih pawhin Mizoram bikah chuan Mizoram Legislative Assembly-in a pawmpui leh phalna telloin UCC hi hman ngawt theih a ni lo a, remna ziah laia Constitution-a article 371 G telh tura theihtawp chhuaha hma latute an fakawmin an ngaihsanawm hle,” a ti.
Remna chu a hlu em em a, a man pek sen rual a ni lo, tiin, “Remna awm turin inngaihtlawm leh inphahhniam a ngai a, hruaitu hmasaten remna a awm theihna’n an inphahhniam thei kha an fakawm a ni,” a ti bawk.
Mizoram sawrkar, MNF leh India sawrkarin inremna (Peace Accord) 1986 June 30-a an ziah atang khan Mizoramah buaina liantham sawi tur a tam lo hle tih Home minister hian a sawi a. Bru National Liberation Front leh Hmar People Convention nen pawh remna tluantling leh tha tak neih a nih thu leh, vawiinah chuan Mizoram chu India rama state ralmuang ber niin remna leh muanna kawngah state dangte awh ber a ni hial tih a sawi a ni.
Remna Ni chu political party pakhat ta bik a ni lo, tiin, Mizoram mipui zawng zawng ta a ni a; Zoram mipui neitu thinlung pu a, Remna Ni chu uar zawka hmang zel thin turin a sawm tih a sawi.
Mizoram thenawmah remna leh muanna awm loh avangin mi tam takin in leh lo, nunna hlu tak an chan mek tih
Lalchamliana hian a sawi a. Hei hian remna hlut zia a tilang chiang hle tih a sawi bawk.