Remna ziah hriatrengna hmang

Mizorama remna thuthlung (peace accord) ziah hriatrengna leh lawmna chu Aijal Club-in June 28 zan khan an buatsaih.
Hmanpuitu larsap Dr Hari Babu Kambhampati chuan Remna Ni hian remna leh muanna, inpumkhatna leh hmasawnna kawnga ke pen duhna a tichiang tih a sawi a. Remna a awm theihna tur leh Mizoram tana hmalam hun eng zawk siam tura remna kawnga thawktu zawng zawng chungah lawmthu sawiin, “Remna thuthlung hlawhtling tluantling awm tlemte zing ami a ni,” a ti.
Chief minister Lalduhoma pawhin remna leh muanna a awm theihna atana theihtawp chhuahtute inpekna chu ropui a tih thu a sawi a. “Mipui tawngtaina Pathianin a chhang a, remna kan neih theih bakah he remna hi a tluantlinga kan vannei hle a ni,” a ti. Kan hun tawn atangin inzirfin a pawimawh tia sawiion, tunah chuan remna leh muanna duhtu kan nih angin India khua leh tui rinawm tak nih kan tum a pawimawh tih a sawi a ni.
Remna thuthlung ziah hriatrengnaah hian chief minister hlui Laldenga (L), Peace Accord ziah laia chief secretary, signatory Lalkhama, IAS (Rtd), chief minister hlui dang – Lal Thanhawla, Ch Chhunga (L), Brig. T Sailo (L), Zoramthanga bakah chief minister ni lai Lalduhoma te hnenah chawimawina thilpek hlan a ni.
Mizoram Peace Accord 1986 hi India sawrkar leh Mizo National Front kara inremna thuthlung, kum 1966 atanga intan Mizorama helna tihtawpna a ni a. He document hming hi ‘Mizoram Accord 1986: Memorandum of Settlement’ tih niin, June 30 khan MNF president Laldenga, Union Home secretary RD Pradhan leh Mizoram chief secretary Lalkhama ten hming an ziahhnan a ni.
Kumin Remna Ni hi Pathiannia a tlak avangin June 28 khan a lawmna hi Mizoram pumah hman a ni.