Republic Day parade-ah hmeichhe hlang

Nakum Republic Day parade-ah hmeichhiate chauh teltir an ni tawh dawn a, marching contingents atanga tableaux leh performance hrang hrang chi tinah hmeichhiate chauh an tel dawn tiin sorkar lam thuneitute chuan an sawi.
Hei hi hmeichhiate dinhmun chawikan leh tihchangtlun tumna niin military mai bakah sector hrang hrangah inhnamhnawih tam zawk se tihna a ni tia sawi niin sorkar department leh armed forces te pawh hriattir an ni tawh tia sawi a ni bawk.
March thla khan he mi kaihhnawiha mi pawimawh annual parade a tel thin te chu hrilhhriatin an awm tawh a. Republic Day parade hi Rajpath, central Delhi ah January 26 ah neih thin a ni.
“Republic Day 2023 ah chuan hmeichhiate chauh telna contingents, tableaux leh perfornance tinah te remtih leh kalpui a ni ang,” tiin senior government official chuan a sawi.
Ministry zingah Home Affairs, Culture leh Urban Development te chu hmalak dan tur hrilh hriat an ni tawh tia sawi a ni bawk a. Army te pawhin sorkar atangin hriattirna lehkha an dawng tawh tia sawi a ni bawk.
Republic Day parade hi India military ropuina te cultural diversity leh hlawhtlinna hrang hrang te phochhuahna remchanga hman thin a ni a, mi sang tam takin a hmunah leh television kaltlangin an thlir thin a ni.
Hei bakah hian India freedom fighters te chawimawi nana hman thin a ni bawk a, parade-ah hian hmeichhiate aiawh leh armed forces leh field hrang hranga hmeichhiate chu phochhuahin an awm thin bawk.
Kum 2015 khan service pathum atangin all-women contingent te a tum khat nan an inlan tawh a. Kum 2019 khan Captain Shikha Surabhi chu Army Daredevils team bike stunt kalpui zinga hmeichhia tel hmasa ber a ni tawh bawk a.
A kum lehah Captain Tania Shergill chu all-men contingent kaihruaitu hmeichhia hmasa ber a ni bawk a. Kum 2021 khan Flight Lieutenant Bhawan Kanth chu parade a tel hmeichhe pilot hmasa ber a ni bawk.