RESEVED FOREST BIHCHIANNA

James Vanlalringa
Vairengte

Mizoram District (Forest) Act 1955 (Section 14 leh Section 21) tlawh chhanin Dt 28.01.1965 khan Assam Gazette Notification ti chhuakin Council reserved Forest hmun hnihah puan a ni a. Pakhat chu Mizorama Lui 16- te , lui lai tak atanga teh a a kam tawn tawn mel chanve (800 metres) a zau Reserved Forest atan a puang a, chu chu Riverine Reserved Forsest ti a kan lo hriat thin kha a ni. Chung lui te chu : (a) Tlawng, (b) Tut (c) Teirei (d) Langkaih (e) Chemlui
(f) Serlui (g) Tuivai (h)Tuivawl (i) Tuirini (j) Tuirial (k) Tuiruang (l) Khawthlang tuipui (m) Tuichang (n) kau (o) De (p) Phairuang, A pakhat dang leh chu Aijal – Silchar Road via Sairang, Motor kawngpui dung, a sir tawn tawn 100 feet pawn lam, mel chanve (800 metres) a zau chu Reserved Forest atan a puang tel bawk a, chu chu Roadside Reserved Forest tia kan hriat hi a ni.
RESERVED FOREST HI DAN ANG TAKA PUAN A NI EM?
Reserved Area puan a nih dawnin danin a phut angin thil tih ngei ngei tur a awm a, The Mizoram District (Forest) Act 1955 (Section 15,16,17,18,19,20) ah te hian Reserve Area puan dan tur chiang takin a tarlang a. A hmasa berin mipuiah hriattirna (Preliminary Notification) an chhuah phawt tur a ni. Chumi hnuah uluk takin survey an nei tur a ni a, survey-ah hian reserved area zau zawng tur te, a ramri te an siam fel vek tur a ni. Tin, Reserved Forset Area-ah mihring cheng an awm leh awm loh te, khua engzat nge awm, huan leh ram nei engzat nge awm tih te record fel taka ziakin Council Committee-ah an thehlut tur a ni. Ni 120 chhung harsatna nei te leh complain duh tan hun an hawng bawk tur a ni. Complain nei te tana thu thlenna tur leh thubuai ngaihtuah turin Forest Tribunal an din bawk tur a ni. Hetah hian Reserve Area atana sawrkarin ruahmanna a lo siam chu a duh lote tan pawh Appeal-na hun hawn bawk tur a ni. Tichuan heng tih tur zawng zawngte hi an tih zawh vek hnuah chauh Final Notification hi an chhuah tur a ni.
Dan tlawhchhana Reserved Area an puan hian danin tih tura a phut hrang hrangte hi pakhatmah an zawm lo a ni. Dan an zawm loh langsar zualte han tarlang ila :
i) Reserved Area puan a nih tur thu hi Official Bulletin ‘Zoram hriattirna’ kaltlangin mipuiah puanzarna an nei lo. He Council Reserved Forest hi Preliminary Notification awm lovin Final Notification an chhuah tawp niin alang. Mipuite hriattirna tur hian Tlangau hmang pawh a puanzar a ni lo bawk.
ii) Reserved Area an puan dawn hian Survey an nei lo hrim hrim bawk. Aijal – Silchar Road kawngpui dungah hian reserve area an puan hma kum tamtak kal ta ah henglai hmunah hian khua engemaw zat a lo awm tawh, chung khuate chu survey mumal awm lovin reserve area atan an puan hnan hmiah a ni. Khawi khua mah sawn chhuah an nei lo bawk.
iii) Reserve area chhunga cheng mipuite ngaihdan leh remtihna pakhatmah an la lo va, claims & objection period pawh an siam lo bawk.
iv) Tin, chu bakah Assam Forest Regulation Act 1891, Section 17 leh Indian Forest Act 1927, Section 20 te hi Forest Reserve puanna tur a dan an tlawhchhan thin te an ni a, hemi hnuaiah hian reserve forest an puang thin. Assam sawrkar hnuaia Mizoram chhunga reserve area an puan hian heng forest dan tlawhchhan hian an puang lo bawk. Chuvang chuan he Reserved Forest Notification hi pawm theih a ni lo.
A ram mipui ten reserve area an puang dawn a ni tih pawh hre miah lovin kan ram chhungah Assam sawrkarin Reserve Area min puan sak a. A ram leilung awm dan pawh zirchiang hmasas lovin he reserve hi an puang bawk a. Chuvang chuan The Mizoram District (Forest) Act 1955 Section 14 & 21 tlawhchhana Reserved Forest Notification 1965 hi legally & physically in pawm theih a ni lo. Dan an zawm lohna hrang hrang kan tarlan te hi Notification cancel tur a point tling vek an ni.
ROADSIDE RESERVED FOREST (97.20 Sq.km)
Roadside Reserved Forest hi kan chian lehzual nan chipchiar deuh hlekin han sawi ta ila a tha awm e. Assam sawrkar hnuaia Reserved Forest an lo puan hi UT leh State kan nih hnuah pawh kan la chhawm chho zel a. Adaptation of Laws –(Allocation of Bussiness Rules-Eight Schedule, Sl.no 5 ) ah he Reserved Forest hi a ngai anga lakluh / sengluh a ni. He Reserved Forest hian an puan atangin a kum 59-na a hmang mek a ni. Reserved Forest te hi a nih ang ang hian hun rei tak chhung kan lo en liam mai mai tawh a, sawrkar ang pawhin siam that tumna hi a awm em em lo niin a lang. Amahreawhchu, lui dung humhalhna dan – Riverine Reserved Forest bik hi nikum mai khan ennawna siam that a ni. The Mizoram (Protection of Rivers) Act 2023 chu Dt. 18th Sept. 2023 khan Gazette Notification pawh chhuah a ni tawh nghe nghe. Mizoram chhunga kan luite humhalhna tura dan mumal tak a awm ta hi a lawmawmin, kan hma lam hun atan pawh thil tul leh pawimah tak niin a hriat. Hetiang chiah hian kawngpui kam a rawmngaw humhalhna dan- Roadside ReservedForest pawh hi ennawn ngei ngei tur a ni.
Roadside Reserved Forest hian khawi chin nge a huam:
Tun hma atangin Dak In (Post Office) hi khaw kar hlat zawng – Mel zat chhiar tan nan an lo hmang thin a, chuti a nih chuan Aijal – Silchar Road via Sairang hi tuna Aizawl Dak Inpui Treasury Square atanga intan hi a ni dawn tihna a nih chu. Hemi kawng hi Aizawl hmar lamah pheiin Bawngkawn – Durtlang road lamah a kal a, tlang kawng lam zawh zelin Kawnpui daia tuna Sairang road-ah hian a chhuak thla a, chuta tanga kal zelin he kawng hian Silchar a pawh thla ta a ni. Roadside Reserved Forest hian Aijal – Silchar inkar motor kawngpui sir tawn tawn, 100 feet pawn lam (100 feet hi road reserved a ni) atanga teha Mel chanve (800 metres) a zau hi a huam a ni. A zau zawng teh dan turah pawh hian boruak mel / sava thlawk anga ngil taka teh tur a ni. He Reserved chhungah hian Aizawl Dak Inpui atanga hmar lama Aizawl veng hrang hrang 800 metres chhung ami chu a huam tel vek a ni. Thil mak deuh chu Roadside Reserved Area ah Sairang an telh tlat mai hi a ni. Khatih hun laia Aijal – Silchar Road an tih chu tlang kawng lamah (Durtlang, Sihphir, Lungdai, Serkhan, Zanlawn, Kawnpui) vek a kal a, Sairang kawng hi a la awm lo hrim hrim. Tuna Sairang kawng (NH 54) hi chu 1980 chho vela an upgrade chauh kha a ni, khatih hun lai khan Sairang hi Aijal – Silchar Road hian a paltlang lo, location hran daih a ni. Chuvang chuan Reserved Notification ah ‘via Sairang’ tih an telh hian Survey awm lovin an puang tawp tih a tichiang hle.
Reserved chhung (Effected Area) a khua awmte:
Roadside Reserved Forest chhungah hian khua leh veng engemawzat a awm a, chung khuate chu Reserved Notification chhuah hma leh chhuah hnua din te an ni hlawm. Hriat theih chinah Notification chhuah hmaa khua lo awm tawhte han tarlang ila, (khaw din kum hi tihsual palh a awm mai thei a, min lo ngaidam ula). Aizawl (1890), Durtlang (1892), Sihphir(1910), Lungdai (?), Serkhan (1908), Zanlawn (1946), Kawnpui (1879), Bualpui (1850), Thingdawl (1907), Kolasib (1869), Rengtekawn (1909), Bilkhawthlir (1904), Vairengte (1904).
Kum 1965-a Reserved Area an puan lai khan heng khuaahte hian mihring engemawzat an lo inbengbel tawh a ni. A mi chengte remtihna emaw hriattirna emaw pawh awm lovin Assam Sawrkar khan heng khuate hi Reserved Area atan a puan hnan hmiah mai a ni. Hei hi ram mipuite min zahlohna lian tak a ni a, pawm zam ngawt theih a ni lo. Tin, India Danpui hnuaiah Mizoram chu Sixth Schedule hmanga humhalh tlat kan ni a, kan eizawnna leh culture thlenga nghawng thei a ni tih hrereng chunga Reserved Area min puan hnan hi khua leh tuite rahbehna a ni bawk.
ROADSIDE RESERVED FOREST HI NEIH CHHUNZAWM ZEL CHI A NI EM ?
District Council hun laia Reserved Forest an puanna chhan ber chu chhiah (Revenue source) an duh vang niin mi thenkhat chinchang hre deuh chuan an sawi. Khatih hun lai khan District Council khan sum hmuhna a nei tam lova, District inrelbawl nan sum a ngai ve bawk si a, Reserved Forest atanga chhiah tlem tlem rawn lut tur beiseina avangin Assam Sawrkar khan Reserved a puan sak ta mai niin an sawi bawk. Khatih laia Reserved an puanna rilru (Spirit) kha Ramngaw / Environment humhalh duhna ngawr ngawr ai mahin sum mamawhna avang zawk a nih hmel. He thil hi a proof na awm chiah lo mahse, Reserved Notification an chhuah dan atanga han thlir vang vang hian a dik mai awm mange a tih theih.
Tun dinhmunah Aijal – Silchar Road via Sairang a Roadside Reserved Forest hi Reserved Forest anga cheibawl emaw Reserved Area anga la neih chhunzawm zel chi a ni tawh lo. Kan hriat theuh angin ram a lo changkang a mihring kan lo pung ve zel bawk a, in leh lo huan lo ram kan mamawh nasa tual tual a, chutih laia Reserved Forest lo la neih tum phet hian awmzia a nei tawh lo. Heng Reserved hmun te hi tunah chuan chenna hmun (residential area) leh huan ram atan a zavai deuh thaw mai hian a chang zo tawh. Chuvang chuan Reserved Area atana neih chhunzawm hi a tiha tihchi rual a ni tawh lo.
Roadside Reserved Forest hi Dan angin la awm zel se kan ti a nih chuan hengte hi Sawrkarin a tih ngei ngei a ngai ang : i) A hmasa berin Aizawl-Silchar Road a khua/veng awm zawng zawngte hi Sawrkarin Eviction Notice pein a sawn chhuah vek a ngai ang. ii) Khaw thar dinna tur Sawrkar in a ngaihtuahsak a ngai ang. iii) Reserved Area chhunga in hmun leh huan Pass/Permit nei zawng zawngte hi Sawrkarin a Cancel sak vek a ngai ang. iv) Reserved Area atanga a sawn chhuahte inbenbelna tur sum tam tak Sawrkarin a pek a ngai ang. v) Mi tam tak insawn chhuak duh lo an awm ngei ang a, buaina nasa tak chhuakin Sawrkarin Force hial a rawih a ngai ngei ang.
Heng point tlemte kan han tarlan atang ringawt pawh hian Reserved Forest hi a nihna anga cheibawl leh enkawl chhunzawm zel theih a ni lo tih a hriat mai awm e. Tin, chubakah Reserved Area chhungah hian Sawrkar Office pawimawh tak tak, Schools, Hospitals, Khelmual, Thlanmual leh mipui vantlang hmunte a awm thluah a, chungte chu thiah leh senghawi vek a ngai bawk ang. Aizawl Dak Inpui hmar lam atanga Vairengte inkara cheng mipuite chu kan phek buai mup mup dawn tihna a ni. Chutih hunah chuan mi tam tak chu Forest Reserved chhungah kan lo awm reng a ni tih hriain an harhchhuak chauh ang. Heng thil hi a thlen loh nan Roadside Reserved Forest hi awm zel se tha kan ti em tih hi mipuite hian ngaihtuahna kan sen a ngai a ni. A hun laia thil tha tak ni a lang, mahse tun huna kan tana tangkai tawh lo leh hnawksak mai ni ta hi kan dah bo a hun tawh takzet a ni. Ram mipuite hi kan thanharh a ngai, a hunlaia thil kan ngaihtuah peih lohna rah hi nakin zelah kan la seng thei tih hi hria ila a tha khawp mai.
REVENUE vrs FOREST
Kum 1965-a Aizawl—Silchar via Sairang inkar kawng (800 mtrs) hi Roadside Reserved Forest atana puan a nih atang khan vawin ni thleng hian Forest Dept chuan an ramah chhalin neitu dinhmun an la hauh ngar ngar a (Reserved a nihna ang chuan an enkawlin an humhalh chuang lem hlei lova). Revenue Dept lam lahin ram hi kan ta tiin Reserved Area chhungah In hmun leh Ram Pass hrang hrang an pe chhuak chur chur reng bawk a. Neitu nia inchhal ve ve te hi Mipui ten tunge a neitu tak tak zawk ni ang tih hi kan zawhna a ni.
Dt.16.12.2022 a RTI hmanga zawhna, DFO Kolasib in a chhanna thenkhatte hi lo tarlang ila :
Zawhna 1. Roadside Reserved Foresr Area ah hian EF&CC Dept hian hma a la em ? Engtinnge a enkawl ? P/Patta, House Pass/ LSC te LR&S Dept in a pek te hi Forest Dept hian a hriatpui em ? Objection a siam em ?
Chhanna : Roadside Reserved Forest hi EF&CC hian neitu nihna (Nodal Dept) neia him taka awm tura dan (Forest Act 1955 & Forest Conservation Act 1980) hmanga humhalhna bak sum leh tha senga enkawlna a awm hran lo. LR&S Dept in Roadside Reserved Forest chhunga P/Patta, House Pass/ LSC a pek te hi EF&CC Dept chuan a hriatpui lova, remtihpuina pawh a pe lo. Chu mai chu ni lovin LR&S Dept hian a chhunga ramngaw humhalhna dan kan tarlan te hi an bawhchhia a ni. Hetiang Pass te hi a pechhuaktu Dept hnenah Cancel tura ngenna / hriattirna pek thin a ni a. NGT Order Dated 12.05.2020 bawhzuiin Kolasib DFO pawhin dan bawhchhia Pass a lo pek chhuah tawhte pawh Cancel leh turin Dt.12.10.2020 khan LR&S Dept hnenah lehkha a lo pe tawh a ni.
Zawhna 2 : Roadside Reserved Forest Area enkawl nan hian EF&CC Dept hian Sum engzatnge a sen tawh ? Sum a seng a nih chuan a senna details min pe thei em ? Tin, thing a phun a nih chuan eng thing te nge ?
Chhanna : Roadside Reserved Forest enkawl nan hian EF&CC Dept hian a hranpain sum sen a nei lo.
Zawhna 3 : Roadside Reserved Forest Area chhunga In leh Lo neite hi EF&CC Dept hian engtinnge tih a tum ?
Chhanna : Dt.19.02.2022 a GAD Meeting Minute chuan CALA Kolasib-in Dt.25.10.1980 Forest Conservation Act lo pian hma leh a lo pian hnua Roadside Reserved Forest huam chhunga Ram Pass neite lo thliar fel a, a report chu DFO Kolasib hnenah thehlut tura a tih chu tun thlengin a la thehlut lova. He report hi a thehluh veleh 25.10.1980 hnu lama Pass pek chhuah te chu Cancel tura hmalak a ni ang.
Roadside Reserved Forest chhungah hian Dan ang thlapa In hmun leh Huan Pass nei tam tak an awm a. |henkhat chu District Council hun lai amite a ni a, tin, 2010 hma lama Village Council-in Ram pek/theh phalna an neih hun laia VC ten Pass an lo pekte pawh a awm nual bawk a. Revenue Dept hian Mizoram (Land Revenue) Act 2013 tlawh chhanin Valid Pass a pe chhuak reng bawk a, chung Pass neite chuan Sawrkarah chhiah mumal tak an chawi bawk a ni. Forest Dept hian Reserved Forest chhunga dan lova awm, Pass an lo pek chhuahte Cancel turin Revenue Dept ah lehkha te hial an lo pe tawh a ni a; hei hi Revenue Dept te hian tun thlengin hma an lak awm kan la hre lova, an pek belh zel zawk niin a lang a ni. Tunah hian Reserved Forest hi neitu nihna pahnih awm mek karah mipuite hi min awmtir ni berin a lang a, Sawrkar hian a rang lama a tihchian vat hi a ngai a ni ber mai. He thil hi chinfel vat a nih loh chuan Ram inchuhna avanga intualvuakna hial pawh thleng thei a ni a, thuneitu lam te pawhin ngaihven rang se a tha khawp ang. Tin, Forest Dept hian RRF hi kan ta a ni ti a a hauh a nih chuan a then a zar chauh hi hauh lovin Reserved Area zawng zawng hi hauh sela, strict takin enkawl bawk rawh se, a nih loh chuan Reserved Forest hi phum bo ngam rawh se.
RESERVED FOREST HI HMASAWNNA DALTU A NI
Roadside Reserved Forest Buaina:
Reserved Forest avanga Zoram tana thil pawi tak chu hmasawnna tithuanawptu leh tibahlahtu a ni hi a ni. Project hrang hrangah harsatna siamtu a ni a, kan nih tur ang ni phak lovin min siam a, kan thenawm state te aiin kan hnufual phah bawk. Reserved Area chhunga ram neitute tibuaitu leh a hun taka an ram man la thei lova tihkhawtlaisaktu a ni bawk.
Tun hnaiah Vairengte – Sairang inkar 4-Lane kawngpui laih turah pawh RRF avangin harsatna leh buaina nasa tak a thleng mek a. Kum 2020 atanga ram lak fel tawh vawin ni thlengin a la fel hlei thei lo chu a nih hi. Forest Dept te chuan he 4-Lane kawngpui kalna tur ram hi Roadside Reserved Forest a ni e tiin Forest Clearance a demand a. Chutih mek lai chuan Dt.27.01.2021 khan Guwahati High Court chuan Mizoram Forest Act 1955 Section 14 & 21 tlawhchhana Reserved Forest an puanna chu a rawn paihthla ta a. High Court thu benchhanin Mizoram Sawrkar pawhin ram tihchianna ( Status of Land ) ti chhuakin, Reserved Forest a awm tawh lova, he ram hi Govt Land / Private Land a ni tawh, chuvangin Vairengte – Sairang inkara 4-Lane kawng kalna turah Forest Clearance pawh lak a ngai love tiin thuchhuah a siam zui ta a ni. Forest Dept chuan High Court Order leh Sawrkar thuchhuak chu pawm duh lovin, vawin ni thleng hian Thingkih phalna (Tree Felling Permit) a pechhuak duh ta lo a ni. Chumi avang chuan he 4-Lane kawng laih hna pawh hi tan thei lovin an awm a, ram an laksak te hnenah pawh Zangnadawmna sum pek chhuah theih lohvin a awm phah ta a ni. Hetia Forest Dept ten Court Order leh Sawrkar thuchhuak pawisa lo leh zawm duh lova a awm ta mai hi thil mak tak a ni. Court zahawm tak thuchhuak zah lohna ( Contempt of Court ) thubuai te hi an awrh palh ang tih pawh hlauhawm tak a ni.
Kan hriat angin Vairengte – Sairang kawng hi Mizoram Kawngpui pawimawh ber leh kan chak lakluhna (Lifeline) pui ber a ni a, tuna kan kawng dinhmun te enin kawngpui tha neih hlan hi a nghahhlelhawm em em a ni. Ministry of Road Transport & Highway ten 4-Lane siam tuma hma an lak mek laia Roadside Reserved Forest avanga tun thlenga kawng laih hna tan thei lova a awm ta mai hi a vanduaithlak tak zet a ni. Roadside Reserved Forest avanga he 4-Lane kawng laih tur hi pamtul a nih vaih chuan engtikah mah hetiang proposal hi kan ramah an rawn siam leh tawh lovang, an Cancel a nih chuan Zoram tan channa nasa tak a ni bawk ang.
4- Lane kalna tur Alignment chhungah hian mimal ram nei thahnem tak an awm mek a, chungte chu sawrkarin he kawng kalna atan hian dan angin an ram chu laksakin, kum 2020 atang khan an ram hi khawih theih lohvin a lo khuahkhirh (Freeze) sak tawh bawk a ni. Huan thlaia eizawngte pawhin nasa takin harsatna an tawk mek a, kum 4 lai mai an ram khawih thei lova awmin hmathar pawh an la thei lo a ni. Ram neitu thenkhat phei chuan 4-Lane kalna tur ram an lo pek tawh hi Sawrkarin pekir leh mai se an duhthu an sawi hial a ni. |henkhat chuan RRF avanga buaina an tawk hi an hrethiam lo hle a, Forest-in kan ram an tih chuan a hmunah rawn kalin an ram chu rawn kawk rawh se tiin an thinrim thu an auchhuahpui hial tawh a ni.
Hetih mek lai hian harsatna siam belh tumin Environment NGO te pawh an awm mai mai bik lo. An rawn vei thar ta thut emaw tih turin 4-Lane a kal dawn ta maw tihah kan Environment chhe tur an rawn hmangaih thar ve leh a. Assam nena Ramria kan buai laia Sawrkarin Nuai sang tel tehmeuh senga Ramri Kawng hmun hrang hranga an laih mup mup laite khan khawiah nge an awm le? Khang an kawng laih te kha belhkhawm ila tuna 4-Lane kawng an laih tur Vairengte – Sairang ai pawhin a thui zawk ngei ang. Khang an kawng laih te khan nasa takin kan Environment a tichhe lovem ni? Ram chhe tur hi vei tak tak ni sela a thim a var pawh thlu lovin mawngvawmba ang maiin an che chhuak tur hi a ni asin le. Sum awmna lam a Environment chhe tur vei kan lo pung hluai thin te pawh hian ngaihtuahna a ti thui mang e. Zoram tana thil tha ti nia inngai Environment veitute hmalakna hi mi zawng zawngin tha kan ti vek lem lo, an hmalakna phenah hian mi tam tak rilru hrehawm ngawih ngawihin an siam a ni tih hi hre tel mawlh teh se. Reserved Forest hi hmasawnna daltu a ni kan tih rual hian , a phena environment activist te hi an hnawk zawk mah awm e.
RESERVED FOREST NOTIFICATION HI DENOTIFY / DE-RESERVE A NGAI
Harsatna tam tak min siamtu RRF hi Denotify/De-reserve tura hmalakna hi Sawrkar emaw Pawl angin emaw a la awm chiah lo niin a hriat. Reserved Area chhunga cheng mipuite pawh hian kan bengkhawn vak lo nge, heti lam hawia Sawrkar han nawr kal turin Aw kan chhuah ngai meuh lo niin a lang.
Sawi tur ting chuan Mizoram Sawrkar chuan TN Godavarman Case chungchangah 1997 khan Supreme Court-ah Affidavit File a lo thehlut ve tawh a. Amaherawhchu, he thil hi bawhzui chhunzawm a ni ta lo nge vawin thlengin a thawm hriat tur a awm lo. Dt.27.02.1997-a Supreme Court-a Affidavit a thehluhah hian Expert Committee Report pawh kimchang taka thehluh tel a ni. Expert Committee ten Mizoram chhunga Reserved Forest neih chhunzawm zel a remchan tawh lohna chhan hrang hrangte sawiin hei hi tihtawp (Abolished) mai nise tiin rawtna an siam a ni. Tihtawp rawtna chhan point thenkhatte han tarlang ila : i) Loh theih lohva lo neia eizawngtuten ram (reserved forest) an tihchereu zel vangin, ii) Reserved Forest chhungah khua (villages) engemawzat a awm vangin, iii) 1965 kuma Reserved Forest an puan atanga Forest Conservation Act 1980 inkarah , heng reserved hmunah hian chenna in (permanent residential) leh huan nghet nei tam tak an awm tak vangin, iv) Mizoram chu kum 20 chuang rambuai in min tlakbuak a, hemi chhung hian dan angin reserved forest te hi humhalh theih a nih loh vangin, v) Kum tam tak reserved area chhunga lo awm tawhte sawn chhuah hi thil theih ni a lan loh vangin. He Affidavit hi Sawrkar hian thar thawh leh sela a duhawm khawp mai. Nikuma Sawrkar in Lui kam humhalhna Dan thar – The Mizoram (Protection of Rivers) Act 2023 a duan lai khan Kawngpui kam – Roadside Reserved Forest an lo ennawn telve lo kha a pawi ngawt mai. Ram mipui khawih thil a ni a, dan siamtute tan pawh ngaihthah chi a ni lo.
Reserved Forest Notification hi Gauhati High Court-in lo hnawl tawh mah se, Court sang zawka Appeal leh theih a ni a, Court-in a ngai ang hian awm leh rawh se tiin thutlukna pawh a siam leh thei a ni. Chuvang tak chuan he RFF Notification hi Denotify /De-reserve tir hi tihmakmawh a ni. Denotify lova a awm reng chuan tuten emaw remchangah la in Court-ah an Appeal leh ngei ngei dawn tih hi thil chiang sa a ni. Denotify tir hi Sawrkar mawh liau liau a ni. Ram mipuite harsatna sukiang tura Sawrkarin hma a la duhlo a nih chuan a mualpho ngei ang. A ranglamin Roadside Reserved Forest dinhmun dik tak hi zirchiang sela, effected area a mite pawh min rawn tawh sela, he reserved hi a tak taka hman zui zel a remchang tawhlo a nih chuan thiah tir mai kha thil finthlak tak a ni.
Tun dinhmunah State sawrkar pawh hian Reserved Forest a an lo puan tawh hi ama thuin a lo tidanglam ngawt thiang lo va, Forest Conservation Act 1980 hma lam kha chuan heng reserved te hi a tul a tih chuan a De-reserve thei a. Amaherawhchu, Forest Act 1980 hnu lamah chuan De-reserve emaw Denotify tur chuan Central Sawrkar ah thlenin Supreme Court phalna a lak ngei ngei a ngai a ni.
Mizoram, State puitlinga hlankai kan nih dawna he Forest Reserved Notification 1965, Assam hnuaia kan awm laia dik lo taka an lo puan ennawnna chang hre lova a ngai ngaia kan lo pawm/senglut tawp mai kha a pawi ngawt mai. Law Dept lam tal khan lo zirchiangin lo hnawl sela chuan tun hnua buaina tam tak hi kan tawk lo tur a ni a. Hemi avang hian Tuirial Hydel Project-ah nasa takin kan buai phah tawh a, hun rei tak project a tikhaihlak a; hei tunah RRF avang bawkin 4-Lane kawng laih turah kan buai leh ta chiah a, kum 4 hnuah pawh kawng lai thei lovin an awm phah. RRF hi advantage-ah lain thenkhatin a tihbuai dan tur ringawt an lo dap ve char char bawk a, RRF avang hian kan buai nuai nuai ni berin a lang. Dan dik lova an lo puan RRF hi mi thenkhat ten hum tum tlatna rilru an pu reng mai pawh hi a dik bik lo.A dik lo leh tangkai tawh lo na na na chu paih ngam a tha. RRF paih lova heti lehchen kan lo awm hi a phenah hian paih phal lohna chhan tur thildang a awm zawk em ni tih hi ngaihtuah tham a tling.