Resource Mobilization
Tun hnaia Mizoram Resource Mobilization Committee (MRMC) thukhawm chuan thu pawimawh tak tak an rel a, chung zinga pakhat chu Mizoram Police officer te’n orderly an kawl mek tihtlem chungchang a ni.
Tun dinhmunah Mizoram Police officer ten orderly an kawl mek hi an vaiin mi 346 an ni a, hei hi MRMC chuan 118 -a tihtlem tha an ti a. MRMC hian Chief Secretary leh Secretariat-a officer ten household MR an kawl zat a lo tihtlemsak tawh a; Mizoram sawrkarin kum tin cheng vaibelchhe engemaw zat a hum theih phah a ni awm e. Tuna Police orderly tihtlem pawh hian sawrkar senso a tihtlem phah dawn bakah police department-a thawktute daihzai zawka semdarhna a ni nghal dawn a ni.
Keini India ram state zinga a berh ber leh pachhe ber tan hi chuan, tuna sawrkar hnathawk officer lian ten household MR emaw orderly emaw an kawl ang chi tihtlem hi chu thil tihawm tak pawh a ni e. Tuna an tihlemna 118 ringawt pawh hian nasa takin kawngro a su dawn tih a lang nghal a. Thawktu indaihlohna phuhrukna tha tak a ni nghal bakah, sum tam tak riral tur humna tha tak a ni dawn a ni.
Hetiang bawk hian, thil dang dangah pawh, MRMC hian han dap kual zel se, sawrkar sum riralna thenkhat hi chu thahnem tak hum tur a la awm zelin a rinawm. Tunah hian hma an la mek a, a tahtawlin an kal chho mek a ni a, hmasawnna hmuh tur a awm chho zel hi thil lawmawm tak a ni.
Tunhma deuh kha chuan, sawrkar enkawl printing and stationery pawh hi a nihna tur anga chhawr tangkai a ni pha lo hle a, tunah chuan hmanrua changkang zawk leh khawl thilte pawh tha zawk chawkluh belh zel a ni a. Sawrkar lehkha pawimawh chhut ngai ang chi, govt press-a chhut theih reng si, a aia senso thlak zawka pawn lam pan talh ang chi pawh kha tunah chuan a kiam deuh tawh niawm tak a ni a, hei pawh hi thuneitute hian fet deuh zawkin kalphung thar hi han siam leh se, sawrkar sum (mipui sum) tam tak hum theih a ni dawn tih a chiang reng a ni.
Tunah hian renewable energy hman uar lamah sawrkarin nasa takin hma a la mek bawk a, sawrkar office rooftop solar pawh hmuh tur a tam sawt ta hle. Keini state pachhe ve tak tan hi chuan, rooftop solar lama beihpui thlak hi kan tih makmawh a ni awm e; mipui lam pawh hian chhungkuaah mobilization of resource kan kalpui ve pawh hi a pawimawh dawn hle a ni.