RFYC Naupang League

Football a Mizo naupangte tihmasawntu leh football a tithang liantu pawimawh tak chu Mizoram Football Association (MFA) leh Reliance Foundation te tangkawpin an buasaih Reliance Foundation Young Champs Naupang League (RFYC Naupang League) hi a ni. Reliance Naupang league hi Mizorama district pali: Aizawl, Lunglei, Champhai leh Kolasib-ah te kum 2022 atang khan neih tan a ni.
RFYC Naupang League season hmasa ber hi 2022-23 khan khelh tan a ni a. Tuna an khelh mek hi a season lina a ni. Naupang League season khatna atanga season thumna thlengin team 12 te an inel thin a, tuna khelh mek season lina atangin team 16 an inel tawh thung a, season kal meka match 22-na chu January ni 31, Inrinni khan khelh a ni. Team 16 te hi season khat chhungin vawi hnih theuh an inkhelchhuak vek a, chuta point hmu sang ber chu team champion an ni a. Under 12 leh Under 14-a Team champion te hian an team hmingin RFYC Naupang League – Inter District championship an hmachhawn zui leh thin.
Naupang League khel team hrang hrangah hian age category pali ; Under 8, Under 10, Under 12 leh Under 14 te an awm vek a. Kum bithliah team hrang hrangte hian an rualpuite zel an hmachhawn a, an kum mil tawk khelmual buatsaih theuhah a rualin an khel mai thin. Category tinah hian champion an awm vek a, best player, top scorer leh Best goalkeeper thlan thin a ni bawk a, an mahni level theuhna inelna boruak a lian a, tan a na viau thin.
Naupang league khel zawng zawngte hian Jersey, Mawza, Sin Guard, Tui botle leh Bag an dawng vek a. Match an neih zawh apiangin balhla leh in tur tha Juice an dawng ziah thin bawk. Team tin ten coach tha tak tak an neih bakah League buatsaihtuten coach an nei hrang ve leh a. Coach tha tak hnuaiah naupang ten training neiin, zirtirna tha tak tak an dawng thin. Coach tha tak tak ten an vil reng bakah physio tha tak tak ten an vil reng thin bawk.
Naupang Leaegue coach te hian naupangte football an zirtir bakah nunchang mawi an zirtir tel a, an ei leh in tur bakah an luh mek thlengin an ulukpui thei hle. Naupang League hi football thiam nan a tha a, nungchang mawi neih nan a tha tel bawk. Naupangte pawhin an coach te an zah thiam viau a, khawi hmunah pawh hmu se zah takin chibai an buk thin a ni. Reliance Naupang League-a coach ten team hrang hrang traning an pe thin a, he training hi Decentralized Coaching tih a ni a, DECO training tiin an sawi mai thin.
League-a match hrang hrangte hi scout ten uluk takin an vil reng a, naupang zingah talent nei tha bik an zawng thin. Talent nei tha zual an thlante hi Emergin Talent (ET) tiin team khatah an dah a. Emergin Talent hi Under 12 leh Under 14-ah bik thlan an ni. Anni hian coach tha tak takte kaihhruaina hnuaiah a hranpa in training an nei ve leh a, hei hi ET Training an ti mai thin. Team khatah awmin, training nei ho thin bawk mah se League erawh team angin an hmachhawn ve lo thung. Emerging Talent team te hi Inter District championship khel tura hrual an ni a. District hrang hranga Naupang league champion leh ET Team te nen team pariat ten Aizawlah Inter District championship an hmachhawn zui leh thin.
Mizoram chhunga Distric pali-ah RFYC Naupang League khelh a nih bakah League khelh zawh a nih hnuin District hrang hranga player tha zual lawr khawm ten Mumbai-ah Tour an nei a, inelna an hmachhawn zui ve leh thin. Team anga Mumbai-ah tour an neih bakah hian Realiance hmunpui Mumbai-a Football Academy-a awm tur zawnna regional trial neih thin a ni bawk. Regional trial-a tlingte hian State dang trial a tlingte nen Mumbai-ah final trial an hmachhawn zui leh thin a. Trail a kalte hi thlawhnaa an kal man, ei leh in leh thlenna zawng zawnga Reliance lamin an tumsak vek a. Final trial a tlingte pawhin football zirna changtlung takah a thlawnin an zir a, an school fee an tumsak vek vawk. Hengte vang hian Reliance Naupang League khelh hian lukhawng a nei tha em em a ni.
Realiance Naupang League hi September atanga April chhungin khelh a ni tlangpui a, League khel turin Digital Birth Certificate neih ngei a ngai a. Kum dik lo chunga inelna hmachhawn tum chi a ni lo. He Naupang League hian a tum lian tak pakhat chu age Fraud umbo a ni.
Reliance nuapang league buatsaih a ni hi nu leh pate pawhin an hlut hle a, an fate inkhel en pawh an thahnem viau a, an tu leh fate auin an lo tang thei hle. Hei hi inelna tihlu a ni tel bawk.
Naupang te te ten nuam ti taka football an khel hi hmuh an nuam em em a. Naupang tet lai atanga zirtirna tha tak tak an dawng hi an lawmpuiawm a. Inelna tha leh mumal tak an hmachhawn hian football zinkawng dikah a hruai a tih theih. Hun a kal hret ang a, Football ngaina Mizote hian he Reliance Naupang League hi chhawr tangkaiin, hma kan la sawnpui ngei a rinawm.