Rinpuii’n Lungleiah training institute thar hawng

Thingtlang \halaite’n mahni kutkawiha ei zawnna an neih theihna tura thiam thil zirtirna hmun, Rural Self Employment Training Institute (RSETI), Government J. Buana College (GJBC), Lunglei campus ami chu nimin khan health & family welfare minister Lalrinpuii’n a hawng.
Hawn thar RSETI hi Mizorama a pathumna, Lunglei district-ah chuan a hmasa ber, HDFC Bank-in India rama RSETI an kalpui hmasak ber tur ni bawk a ni. Ministry of Rural Development chuan India ram chhunga bank awm zawng zawngte chu RSETI kal tlanga \halai hna nei lote hnenah mahni kutkawiha eizawnna neia an intodelh theihna tura zirtir a, kawng kawhhmuh turin a ti a. Hemi bawhzui hian thingtlang khuaa hna thawh tur nei lote awm tamnaah hmun 598 laiah bank hrang hrang kal tlangin RSETI hi din tawh a ni a, Lungleia HDFC-RSETI hi a hnuhnung ber leh naupang ber a ni.
HDFC-RSETI hawngtu minister Lalrinpuii chuan HDFC Bank-in Lungleiah \halaite thiam thil zirtirna atana RSETI bul an \an chho chu lawmawm a tih thu leh \halaite’n training \ha tak piah lama an bul \anna tur sum ngaihtuahpui thei tur bank nena inkungkaihna an nei leh zel tur chu lawmawm lehzual a tih thu a sawi.
HDFC-RSETI Lungleiah hian trade pathum – puan \hui (tailoring), beauty parlour management leh computer hardware & networking zirna te kalpui niin, zirlai 98 an awm mek a. Zirlai zawng zawngte hi an hmanraw mamawh – uniform, hostel/boarding chenna tur leh ei in leh an zirna senso man chawi lovin a thlawn veka zirtir an ni.
HDFC Bank hi India rama private sector bank lian ber leh khawvela private sector bank lian ber 5-na niin, ram pumah social responsibility leh skills development programme 182 vel a kalpui mek a. Mizorama district pasarihah branch 11 an nei mek a ni. HDFC Bank hian Corporate Social Responsibility (CSR) kal tlangin June ni 16, 2020 khan Civil Hospital Lunglei-ah cheng nuai 40 man hu medical equipment an lo pe tawh bawk a ni.