RiRi’n music history a siam

Kum 10 kalta, 2016 khan a album ‘Anti’ a tlangzarh a, chubak chu album thar a la tichhuak leh ta rih lo, chuti chung chuan Recording Industry Association of America (RIAA) singles certification-ah mellung pawimawh tak a thleng ta tlat mai a, hmeichhe zaithiam zinga RIAA singles certification a maktaduai 200 pel thei hmasa ber a ni ta.
RIAA chuan Rihanna hian US-ah a hla hrang hrang maktaduai 200.5 a hralh tling tawh tih an puang a, hmeichhe zinga he mellung thleng thei hmasa ber a nih bakah mipa zingah pawh pahnih chiah phak loh a nei a, Drake leh Morgan Wallem an ni.
Drake hian RIAA singles certification maktaduai 277.5 nei tawhin, RIAA record siamtu a ni a, a dawttu chu Morgan Wallen niin, maktaduai 215 a nei ve thung. Morgan hi rimawi khawvelin a hmelhriat tak takna hi a la rei lo viau a, 2014 khan The Voice-ah a tel a, 2018-ah a album hmasa ber ‘If I Know Me’ a tlangzarh a, mahse, a larpui lem lo. Rimawi khawvela a rawn larchhuah tak takna chu 2021-a a album ‘Dangerous: The Double Album’ kha niin, rimawi khawvelin a hmelhriat tak takna hi kum 5 tha awrh chauh a la ni a, chuti chung chuan RIAA singles certification-a heti zat a kai thei hi a namai lo tlat.
Rihanna hian feature leh soundtrack pahnih khat a tichhuak tih loh chu 2016 hnulamah rimawi khawvelah a thawm a reh viau a, tunah hian kum 38 a upa ni ve tawhin, rimawi lama hmathar lak leh tawh a tum thu a richhuak zauh zauh tawhnain, tunah chuan a rah hmuh tur a la rih lo.
Pop khawvel a chawlhsan chhung hian a kawppui ASAP Rocky nen fa pathum- RZA, kum 3, Riot Rose, kum 2, leh Rocki, thla ruk mi te a nei tawh a, sumdawnna lamah pawh a hmuingil viau a, billionaire a ni vâng tawh bawk.