EPL final – Manchester City vs Arsenal

Vawiin tlai dar 5:00 atangin English Premier League 2025-26 khelh chhunzawm a ni leh dawn a, tun kar tawpa inkhel ngaihven hlawh ber tur chu champion tuma inel fal mek Arsenal leh Manchester City te inkhel tur a ni. Etihad Stadium-ah City leh Arsenal inkhel tur hi EPL final ang hiala ngaih a ni a, champion tichiang tichiang thei tur, inkhel pawimawh em em a ni.
Table-a hmahruai mektu Arsenal in khelh 32 atangin point 70 an hmu a, an hnuai chiaha awm Manchester City aiin vawi khatin an khel tam zawk a, City ai hian point 6 in an sang zawk mek. Mikhual an nihna hmun Etihad Stadium ah an chak a nih chuan khelh nga khelh hmabak la nei chungin point 9 in an sang fal ang a, champion turin an dinhmun a tha hle tawh dawn. City lakah hian tlawm an pumpelh a, point 1 an hmu a nih pawhin Gunners tan result chhia a ni dawn lo. City lakah an tlawm a nih erawh chuan champion chak viau mah se ‘next season’ an nghah leh nge nge a ngai hial mai thei.
Pahnihnaa awm mek City tan Arsenal hneh a pawimah hle. An mualah an chak a nih chuan Arsenal nen an inkarah point thum chauh a tla zep tawh ang a. Gunners khelh zat an khelh tlin hunah an chak a nih bawk chuan an point hmuh a inzat tawh dawn a. Pressure zo zawk City tan champion theihna kawng a inhawng zau hle tawh dawn. EPL-ah an champion a nih chuan trophy pahnih nen season an khar thei dawn a. An mikhual tur Arsenal hneh tumin thapui tak meuh an chhuah ang.
Manager ropui Pep Guardiola-a’n assistant manager ni thin Mikel Arteta a ngam mang tlat lo va, Arteta enkawl Arsenal hneh an harsat tlat thin. An intum hnuhnung ber Carabao Cup final-ah erawh City hian 2-0 in hnehna an chang thung a. Heta an chakna hian EPL a pawh hnehna chang turin inrintawkna sang zawk a pe ngei dawn a. An malah ngei hnehna changin point thum hmuh ngei an tum ang.