Chaltlang leh Durtlang inkalpawhna ropeway siamna turah awmze nei lovin cheng nuai 1509 a riral.
-- Advertisement --
Mizoram sawrkar chuan kum 2017 khan Ministry of Tourism atangin tourism tihhmasawnna atan Development of Eco-Adventure Circuit hnuaiah cheng nuai 9907 senna tur project 10 a hmu a, Ropeway hi chung project zinga pakhat chu a ni.
Ropeway bunna tur lungphum hi March ni 5, 2018 khan Tourist Lodge Chaltlangah, khatih laia Tourism minister John Rotluangliana’n a phum a. He Ropeway hi Asia khawmualpuia ‘single unsupported span ropeway’ sei ber tur anga sawi a ni a; a thui zawng hi km. 2.23 niin, passenger 24 phur thei, minute 8 chhunga thlen theih tura ruahman a ni.
Comptroller and Auditor General of India Report (No. 2 of 2022) a tarlan danin, Durtlang leh Chaltlang inkara ropeway (Cable Car) bun tumnaah hian, cable-car paltlang turah power transmission line pathum – 132kV, 11kV leh LT line te a awm vangin ropeway project hi tihtawp a ni a. Ropeway bunna tura hna lo thawh tawhnaah hian cheng nuai 1509 chu awmze nei lovin a ral, CAG report chuan a ti.
Mizoram sawrkarin he project atana consultant a rawih hi M/s Leading Edge Adventure & Airparks Pvt. Ltd. New Delhi a ni a. Consultant hian a tih tur, ropeway kalkawng enfel hna – site survey leh site clearance tihfel ngaite tihfel a nei lova. Consultant hian ropeway paltlang tur kawngah hian heng power line hrawl tak takte hi an awm tih DPR-ah a tarlang lo a; chubakah project feasibility report pawh a pe lo niin CAG report-ah tarlan a ni. Hetih lai hian consultancy charges cheng nuai 297 erawh consultant hnenah hian pek fel vek tawh a ni thung.
He project buaipuitu Mizoram Tourism Development Agency (MTDA) chuan cable-car bunna tur sum, nuai 1509 hi September 2017 leh November 2018 inkarah contractor hnenah a pechhuak. Ropeway siamna turah hian Durtlang lama senso tur cheng nuai 3114 ruahman a ni a, hetah hian cable car bik atana senso tur cheng nuai 2483 a tel a ni.
Sawrkar laipui Ministry of Tourism chuan feasibility report leh approval tel lovin cable car bunna tur hna chu thawh a ni tih December 2019 khan a hrechhuak a; cable-car bunna tur cheng nuai 2483 chu project cost atangin a titawp a, he project atana senso chu state sawrkar chinfel turin a tizui. Hemi hnu hian Durtlang project bik cheng nuai 3114 chu 2021 April khan a titawp leh ta a ni.
Hemi chungchangah hian February 2020 khan contractor (M/s NEIP Projects Pvt Ltd) chu cheng nuai 1222 pe let leh turin tih a ni a; September 2020-ah show cause notice pek a ni leh. Contractor hian sum a pek kir theih loh avangin thubuai a kal mek nia sawi a ni.
Mizoram tourism tihhmasawnna atana project hlu tak, ropeway hi thla 30 chhunga zawhfel tura tih a ni a, kum 5 a vei hnuah cheng nuai 1509 senral niin awmze nei lovin a thamral a. CAG Report-in a tarlan dan chuan, consultant-in site survey leh site clearance tel miah lova DPR a siam, Tourism department-in a lo pawm avang leh, power transmission lines a awm leh awm loh enchiang hmasa lova department-in hna a kalpui vang a ni, a ti.