SZA album ‘SOS’ chu Billboard 200 (albums) chart-ah a No.1 a, he chart-ah hian a zawn ni kher lovin kar kua a No.1 tling ta a, tun kum sarih chhunga hmeichhe zaithiam zinga he chart-a album No.1 nihpui rei thei ber a la ni. 2016 khan Adele album ’25’ chu a zawn ni kher lovin kar 10 a No.1 thei a, chumi hnua he chart-a hmeichhe zaithiam album No.1 ni rei leh thei ber chu SZA ‘SOS’hi a ni ta a ni. Hetihrual hian Paramore ‘This Is Why’ chu chart top 5-ah a debut a, Rihanna pawhin Super Bowl halftime show-a a perform chhawr tangkaiin a album ‘Anti’ chu top 10-ah a rawn lang thar ve leh ta bawk.
Billboard 200 (albums) chart hi kar khat chhunga US-a album hralh tam dan atanga tehin chart ranking hi siam thin a ni a, album hralh zat chhut nan album tak tak hralhna bakah streaming atanga album hralhna tlukpui leh album-a hla mal hralhna atanga album tlukpui te belhkhawm thin a ni.
SZA ‘SOS’ hi copy 93,000 an hralh leh a, chung zinga copy 92,000 chu streaming atanga album tlukpui (on-demand official streams maktaduai 126.73) a ni a, album tak tak hralh chu copy 500 niin, album-a hla mal hralhna atangin copy 500 tlukpui a tling thei bawk.
Paramore album thar ‘This IS Why’ chu copy 64,000 hralhin No.2-ah a debut a, tun kum 10 dawn chhunga he chart-a an thlen san ber a ni a, kum khat dawn chhunga alternative album he chart-a thleng sang ber a ni bawk. ‘This Is Why’ hi Paramore-in May 2017-a an album ‘After Laughter’ an tlangzarh hnua album thar an tihchhuah leh hmasak ber a ni.
Chart No.1 hlui Taylor Swift ‘Midnights’ chu copy 60,000 hralh lehin No.2 atangin No.3-ah a tawlh a, chart No.1 hlui bawk Morgan Wallen ‘Dangerous: The Double Album’ chu copy 44,000 hralh lehin No.4-ah bawk a la awm a, he album hi chart top 10-ah a zawn ni kher lovin kar 107 a lang ta a, he chart top 10-a album lang rei thei pathumna a ni ta a, zaithiam studio album pangngaiah chuan top 10-a lang rei ber a ni tawh a, tuna a la phak lo album pahnih hi zaithiam album pangngai ni lo, Original Cast, My Fair Lady, 1956-a tlangzarh chu kar 173 chhung top 10-ah a lang a, pahnihna chu Soundtrack, The Sound of Music, 1965-a tlangzarh niin, kar 109 a No.1 thei bawk.
Chart No.1 hlui Bad Bunny ‘Un Verano Sin Ti’ chu copy 44,000 tling lo deuh hralh lehin No.7 atangin No.5 a kai thar leh a, chart No.1 hlui bawk Metro Boomin ‘Heroes & Villians’ chu copy 43,000 hralh lehin No.5 atangin No.6-ah a tawlh a, chart No.1 hlui bawk Drake leh 21 Savage album ‘Her Loss’ chu copy 40,000 hralh lehin No.8 atangin No.7 a kai thar ve leh ta bawk.
Chart No.1 hlui, Rihanna ‘Anti’ chu chart top 10-ah a rawn invawrh lut leh a, he album hi 2016-a tlangzarh tawh kha niin, Rianna hian Super Bowl halftime show-a a inlan chu chhawr tangkaiin, he album hi copy 36,000 hralh lehin No.50 atangin No.8-ah a invawrh thar leh ta a ni. He album hi 2016 khan kar hnih chhung chart-ah a lo No.1 tawh a ni.
Cart No.1 hlui Harry Styles ‘Harry’s House’ chu copy 33,000 hralh lehin No.9-ah bawk a la awm a, chart No.1 hlui bawk TOMORROW X TOGETER ‘The Name Chapter: TEMPTATION’ chu copy 32,000 hralh lehin No.3 atangin No.10-ah a tawlh ta bawk.
Billboard 200-ah SZA ‘SOS’ a la No.1
Get real time updates directly on you device, subscribe now.