RRF tihtawp tihnun leh tum Jordan Centre midang kutah

Council of Ministers chuan reserve forest thiah tumna chu a ngai anga kalpui a nih theih nan bawhzui a tum a. Sethawna ruihhlo ngaite enkawlna Jordan Center chu mimal/pawl kuta hlan a tum bawk.
Chief minister Lalduhoma kaihhruaiin Thawhlehni khan Council of Ministers an thukhawm a. An agenda pawm zingah Mizoram chhunga Riverine Reserved Forest leh Roadside Reserve Forest tihtawp chu tih nun thar leh tura hma lakna tur a pawm.
Mizorama kawlphetha la pek lohna khuaah eng pek a nih theih nan Revamped Distributions Sector Scheme (RDSS) hnuaia hma lak rawtna chu pawm a ni a. A nghet loa sawrkara thawkten sum an khawl ve theihna atan ruahmanna “Introduction of the Mizoram Provisional Employee Savings Scheme 2024’ pawh pawm a ni.
Agenda chhawpchhuah 16 zingah Council of Ministers thukhawm hian sawrkar thupuangtu I&PR department kaltlanga an tihchhuahah chuan agenda 9 a pawm nia sawi a ni.
Kolasib district Sethawna ruihhlo ngaite enkawlna Jordan Center chu mimal/pawl kuta hlan tura rawtna chu a thuphunga pawm a ni. Thudawn danin, sawrkar hmasa khan an flagship programme SEDP hnuaiah Jordan Center hi dinin, hemi hnuaiah hian a centre hmunhma cheibawl leh tihchangtlun bakah thawktute lak a tel a. Tun sawrkarah SEDP hi chhunzawm a nih loh avangin enkawl zui zelna turah harsatna a awm a, kumin April atang khan tihtawp lailawk niin, enkawl zui duh pawl/kohhran an awm nual a, heng mite atang hian a tha ber tur sawrkarin a la ngaihtuah dawn nia thu dawn a ni.