Ruah a sur, khua a dai

Khua te han lum ve thin bawk mah se Mizoramah hi chuan ruah a tlak hlekin a dai nghal huai zel a, nipui vanglai pawhin ruah a’n tlak chuan a dai leh mai zel! A chang phei chuan khaw lum laiin khua a vawt thin!
Kuminah pawh March velah khua a’n lum tan a, khawthlang lamah phei chuan lum an ti viau hman. Mahse ruah a tla a, a dai leh tawh. Aizawlah pawh miin vawt an ti.
Kumina a vawi khat nan March ni 16-ah ruah tui a tla a, State Meteorological Centre-in an chhinchhiah dan chuan khami nia Aizawla ruah tui tla zat kha MM 19.4 a ni. Lum leh vawt tehna lamah pawh a tlahniam nghal a, khami ni khan a vawh ber laiin 18 degree Celsius a ni.
March velah khua a lum tan a, March ni 13-ah phei chuan a a lum ber laiin 29 degree Celsius, a vawh ber laiin 21 degree Celsius a ni hman. Mahse ruah tui a tla a, ni 19 atanga ni 21 thlengin ni tin a sur. Khua pawh a dai a, ni 21-ah chuan a vawh ber laiin 15 degree Celsius a ni.
Kumina a vawh ber laiin, January ni 19-ah khan 10 degree Celsius a ni a, chu chu thlasik vanglai a la ni. Chuta tang chuan March ni 21-a 15 degree Celsius dinhmun tur a chhut theih mai awm e.
Science & technology department-a State Meteorological Centre-ah hian ni tina khawchin leh sik leh sa dinhmun an chhinchhiah a, Aizawl vawh ber lai chu 2017 January ni 13-a 2.7 degree Celsius a nih lai kha a ni.
State Meteorological Centre enkawltute chuan Mizoramah khaw lum leh vawh thu-ah ruah tui a pawimawh thin thu an sawi a, nipui lai, April leh May velah pawh khaw lum em em lai pawhin ruah tui a tlak chuan a dai leh mai thin tih an sawi.