Ruah sur tluang rih

June hi monsoon intan thla a ni a, pi leh pute pawhin ruah tam thla an tih a ni. Kuminah pawh ruah a tam a, thla tharah pawh a la tam.
State Meteorological Centre-a an chhinchhiah danin, Nikir thlaah (June) khan ruah hi mm 353.7 a tla a, hei hi tam tham tak a ni.
July-ah ni hnih chhungin a tam zui ngang mai a, July ni 1-ah khan mm 84.2 a tla. Remal cyclone ruah ken sur ni, May ni 27, ruah sur bur bur ni-a ruah tla zat kha mm 80 a ni a, July ni 1-ah chu aia tam chu a tla. July ni 2-ah pawh a la tam a, mm 79 a la tling. July ni 3-ah a tlem ta deuh a, mm 3.2 a tla. July ni 4 leh ni 5-ah khua a hul lo na a, teh tham a ni lo.
State Meteorological Centre te chuan 2015 atanga 2023 thlengin Mizoramah chawhrualin ruah mm 833.41 a tla ziah angin an chhut a, kumin January atanga June thlenga ruah sur zat hi mm 177.09-in a tam.
State Meteorological Centre-in an chhinchhiah danin, nikum khan June thlaah ruah hi mm 381.7 a tla a, 2022 June-ah mm 355.3 a tla. Kumin June thlaa ruah sur aiin nikum leh nikum hmasaa ruah sur kha a tam. 2021 June-ah mm 336.1 a tla a, kumin June-a tla aiin a tlem.
May thlaah khan ruah mm 519 a sur a, kum dang May-ah hetiang zat hi a la sur ngai lo. June-ah a tam leh a, July-ah a la tam rih bawk.
Kumin hian ruah a sur tluang a, thla tin a la sur. Nikum kha chuan ruah hmasa ber pawh March ni 16-ah a sur chauh a, kuminah chuan January-ah a sur nghal.