Ruah vangin Maharashtra-ah mi 10 thi, Karnataka buai bawk

Ruah vangin Maharashtra-ah mi 10 thi, Karnataka buai bawk
Pathianni tuk leh Thawhtanni tuk inkara nasa taka ruah sur avanga chhiatna hrang hrang thlengah Maharashtra-ah mi 10 vel an thi a, mi 11,800 chuang hmun hrang hrangah chhanchhuah ngaiin an awm bawk.
Hetih lai hian Karnataka-ah pawh ruah sur nasa bakah Maharashtra atanga tuikhuah sah avangin mi tam tak an buai bawk.
Maharashtra state disaster management department leh thuneitu dangte chuan Nashik district-ah mi pali an thi a, an zinga pathum hi in chim vang a ni a. Dharashiv leh Ahilyanagar-ah mi pahnih ve ve leh Jalna leh Yavatmal-ah mi pakhat ve ve an thi bawk tih an sawi.
An state chhim lam laili, Marathwada region chu a tuar na zual niin Gofavari luia Jayakwadi tuikhuah chu a khah em avangin sah then a ni a. Chhatrapati Sambhajinagar-a Paithan-a cheng mi 7,000 vel hmun hima sawn phah an ni a. Harsul-ah darkar 24 chhungin ruah mm 196 a sur bawk.
Marathwada-a district dang – Beed, Nanded leh Parbhani-ah pawh ruah a sur nasa hle a. Thuneitute chuan state pumah NDRF team 16 tirh chhuah an nih thu leh team hnih dang chu Pune headquarters-ah inrintir an nih thu an sawi.
Chief minister Devendra Fadnavis-a chuan an state dinhmun thlirin Marathwada leh Solapur-a district pariat thuneitute chu chhawmdawlna leh tanpuina lama che chak turin a hriattir.
Indian Meteorological Department (IMD) chuan Inrinni thleng ruah la sur chhunzawm turin a sawi a. Nilainiah hian Marathwada hmun thenkhatah ruah tam vak lo tla turin a hmu lawk am Ninganiah pawh la sur turin a ti.
Zirtawpniah pawh Marathwada huam chhunga Konkan–Goa district chhehvel bakah Madhya Pradesh chhim lam leh Maharashtra-ah a la sur dawn niin an sawi a. Inrinniah pawh heng hmunah hian la sur chhunzawm tura ngaih a ni.
Karnataka-ah chuan ruah sur nasa bakah Maharashtra-a tuikhuahte sah an nih avangin hmar lamah tui a lian nasa a. Luite an luang liam a, lei dawh thleng thlengin a chim a, district hrang hrangah mi tam tak an buai mek.
Maharashtra-a Sina, Veer leh Ujani tuikhuah sah a nih avangin Bhima lui a lian hle a, Jewargi bulah National Highway 50 chimin Kalyana Karnataka leh an state hmun dang inkalpawhna a buai phah a. Kattisangavi-ah pawh tuiin lei a chim tan avangin thuneituten mihring kjjal an phal tawh lo.
Kalaburagi chu a tuar na ber an ni a. Deputy Commissioner Fawzia Tarannum-i chuan Kagina leh Nagavi lui lian avangin Mudabul khua a kal theih loh va, Dandoti lei pawh tuiin a chim avangin lirthei an ding vek tih a sawi.
Kagina lui lian hian Jattur khuaa chenna in 90 chuang chimin mi 200 vel thiar chhuah an ni tih a sawi.
Bidar district-ah ruah sur nasa bakah Maharashtra-a Dhanegaon tuikhuah sah avangin Kamalnagar, Aurad, Bhalki, Hulsur leh Bidar-ah tui a lian hle a. Sikul, in, electric ban leh thil dang chhia a tam hle a. Tui in a chima ina chengte tan relief camp an siam bawk.