US hrekna vangin India-Russia inkar chhe dawn lo – Lavrov
US hrekna vangin India-Russia inkar chhe dawn lo – Lavrov
Russian Foreign Minister Sergey Lavrov-a chuan India-n an ram tuialhthei a lei avanga US-in a hrek nan chhiah sang tak a laksak chuan India leh Russia inkungkaihna ‘a tihderthawn phah lo’ niin a sawi.
Lavrov-a hian Inrinni zana 80th United Nations General Assembly (UNGA) session-ah thu a sawi a, hetah hian India leh an ram inkar hi a sawi chhuak tel a ni.
US-in Russian tuialhthei a lei avanga India a hrekna chungchanga ANI-in a zawh zuinaah Foreign Minister Lavrov-a chuan, “Eibara India leh Russia inkungkaihna hi a derthawn phah lo… Indian prime minister leh foreign affairs minister chuan chiang takin India hi an thawhpui atan a thlang tawh a. US hian India nena an insumdawn tawnna tihlen tumin hma a la mek a, eng ang inremna pawh keng sela, sumdawnna, investment, eibar, sipai, technology leh thil dang pawh ni sela, India hian a hlawkpui tur chauh zelin thil a ti dawn a ni,” a ti.
India-in Russian tuialhthei a lei leh India-Russia inkungkaihna chungchangah pawh Lavrov-a chuan, “…Keini chuan India tana hlawkna tur awm hi tha kan tiin kan zah em em a, Narendra Modi-a’n an ram tana tha tura thil tia ram dang a dawr dan pawh kan zah a, a sang ber thlengin kan inbe pawp reng a ni,” a ti.
Lavrov-a hian India leh Russia inkungkaihna chu a pawimawh tak zet tih sawiin Indian sorkarin ram dang a dawr dan chu a zahawm tak zet tih a sawi a. Prime Minister Modi-a kaihhruai sorkar chuan a ram leh a mite thatna tur ang zelin ram dang a thawhpui thin tih a sawi bawk.
“Tunah hian India leh US inkarah indawrna a awm a, India leh ram dang indawrna pawh lo awm sela, India leh Russia inkar thil bak kei chuan lo sawi theih ka nei lo va. Inkungkaihna pawimawh tak kan nei a, rei tak daih tur pawh a ni,” a ti.
“Tun dinhmunah kan thian Indian hian inkungkaihna atana pawimawh a tih bikah pawh min dawr a, nakinah chuan a dangah pawh min dawr leh mai dawn a, kan inkungkaih dan hi a thuk hle a. India-in a ngaih pawimawh leh a ngaihven zawng thil hi kan zah em em a, Modi-a’n an ram thatna tur ang hawia ram dang a dawr dan hi tha kan ti a ni,” a ti.