Ruahsurin kan nihna pholang

March ni 15 khan ruahthimpui a rawn thawk a, Aizawl khawpui chhung tuiluankawr thenkhatah chuan thli bal dum ngun mai leh bawlhhlawh chi hrang hrang inchawhpawlh a luang nguah nguah a. Heng zinga social media-a lar tak pakhat chu Ebenezer hospital bula tuiluankawra bawlhhlawh luanglai chu a ni. Heng bawlhhlawhte hi khawpui chhung kawmkar hmun hrang hrang atang leh tuiluankawra bawlhhlawh lo inchhekkhawm sa infinkhawm a ni deuh ber awm e.
Ruah a sur apiang hian kan nihna dik tak phochhuahin a awm thin a, zep theih a ni lo, hmuhloh der theih pawh a ni lo; ‘a chiang e lu mam’ tih zawng zawng kan neih zo ta a ni ber.
Faina leh thianghlimna pawimawhzia kan inhrilh in, kan inzirtir mawlh mawlh a; inhrilhhriatna (awareness campaign) lamah pawh beihpui kan thlak nasa tawh. Kan phur thut a, eng emaw Day denchhenin khawlai kan phiat fai a, pawl hrang hrang, institution hrang hrangten langsar takin khawpui dung kan suartluan a, polythene lianpui pui khaibawrin kutkawr nen khawlaia leh kawmkara bawlhhlawh kan chhar khawm a, kan che lai vel thlalak leh video clip pawh social media leh chanchinthar lamah a darh chuai chuai thin. Heng kan thiltih (activity) hrang hrang avang hian keimahni leh keimahni kan infak a, titha kan inti em em a, kan ti tha bawk e. Khawlai dunga kal vel mipuite pawh an fel, khawlaiah bawlhhlawh an thehthang mai mai tawh lo, a paihna tur bawlhhlawh bawmah an paih thlap thlap tawh. Chuti si, engatinge ruah a sur apiang hian tuiluankawr kuang liam zawih zawiha tuihawk len tur bawlhhlawh a awm theih ziah, tih hi zawhna a ni a; a chhanna chu a lang mai awm e.
Tun tuma Ebenezer hospital bula tuiluankawra bawlhhlawh pawh kha, a chhak lam mual atanga tuihawkin a rawn khawnkhawm a ni tih a chiang a. A tlangpuiin chhungkua, sumdawng dawrkai leh kawngpui kama thil zuarte mawhpuh an nuam ber ang.
Heng khawpui thlibal leh bawlhhlawh chi hrang hrang, tuihawkin a len chhuahte hian kawr ruam hrang hrang zawhin lui tê-ah a luang lut a, a tawpah lui lian zawkah an inchhungkawm leh a. Kan lui tui bawlhhlawh tam zawk hi chu lui dunga kalte paih ni vek lovin, a tam zawk hi chu khawchhung mite paih a ni thei tihna a ni.