ENGKIM FEL TAKIN A LO RUAHMAN VEK SI A

By: Reuben Lalnunthara Hnamte
Bible-ah chuan Pathianin khawvel a siam thu leh a chhunga chengten zawng zawng a siam a, an awm dan tur ang theuha a rel fel thu kan hmu a. Chumi hnuah mihring a siam leh a, mihringte chu chungleng sava leh ramsate leh thilsiam dangte chunga thuneitu ni turin a dah bawk a ni tih kan hmu bawk a. Tunlaiah mithiam ten ramsa leh chungleng savate chanchin an zir nasa hle a, an thlate lain an khawsak dan thla an lakte chu kan lo hmu ve thei a, a hmuhnawmin a bengvarthlak thin hle. Heng ramsa leh chungleng savate chanchin han hmuha han hriat hian Pathian hian engkim a lo ruahman felzia a lang chiang hle a. Khawvel mithiamte pawh hian an zir zo thei lo va; an zir chhunzawm zel a nih hi. ramsa te’n an nun khawchhuahna tura an beih dan te, an hmelma laka an invenna tur te, an no an chawmdan leh an nunphung engkim han en hian siamtu pathian ropui zia hi fak sen a ni lo a ni.
Ramsa leh savate hian an nunna tura an eikhawp leh an khawsakna tur bak duhamna an nei miah lo va, an nun khawchhuahna tur erawh chuan theihtawpin an bei a, chaw an zawnga, bu an chhep mai a, a bak duhamna rilru an pu lo. Heng ramsa khawsak dan han hmuh hian mihringte tana an pawimawhzia leh an tangkaizia a hmuh theih a. Chu mai ni lovin ramngaw kan tih te pawh hi Pathianin ramsa leh savate bakah mihringte tana nunna tur leh hriselna tura a lo buatsaih a nihzia kan hmu thei bawk a ni. Ramsa leh sava hrang hrangte khawsak dan han hmuh hian siamtu Pathian finzia leh ropuizia hi sawisen a ni lo hian ka hre thin. Anmahni tawka an nunnna tur leh an invenna tur te, an chithlah leh an no chawm seilenna tur a an finzia te hi a mak a ni tih bak sawithiam a har, an chanchin zirtute ngei pawh hian engkim an khawskna tur a lo rel feltu pathian ropuizia hi hre duh se chuan an puang chhuak awl lo ngei ang.
Changkan kan duhna leh duham vang te, hmasawnnain a ken tel avangte leh mihring lo pung zel avangte hian ramngaw tam tak kan thiat tawh a. Kan luitui te lo kangchatin, boruak thianghlim kan hip turte thlengin a lo khaw lo zo tawh a. Ramsa leh chungleng sava ten chenna tur leh eitur thlengin an tlakchham phah tawh a; ramsa leh savate kan veh a, kan perh a, kan kap a, thang kan kam bawk a, kan tichereu nasa ta em em mai a ni. Kan lui tuia nungchate ngei pawh tur hmanga hraiin, bomb leh generator te nen kan suat a, hmuh tur pawh an tlem ta hle. Mihringte min tihlimtu leh kan nunna hnar hi kan tichereu zel zawng a nih hi. Tui thianghlim leh boruak thianghlim min petu kan thing leh mau te kan ti chereu zel a, ram kan tih kan leh bawlhhlawh a paihna tur lo va kan paih avangte hian kan zoram nuam ngei pawh hi thlaler ramah kan chan tir mek a ni. Dan bawhchhia hremna lah hi kan han tina lo lulai khawp a, hrem ngam loh lah kan ngah bawk. Meghalaya a Garo hnam autonomous nei a awm te khuan an luitui a nungcha bomb leh tur hmanga hraite khu Rs.50,000 an chawitir bakah, sangha chaw zawng zawng an pektir bawk a, an tangrual hle. An luituite khu a thianghlimin sanghate nen mihringte tui an chengho mai a ni.
Mihring mit titlaitu ber chu – ram mawi tak tak leh ramngaw, chungleng sava leh ramsate chetla vel hi an ni lawi si. Chuti chung chuan tihhlum leh tih chereu kan pawisa leh lawi si lo; a chhan ber chu mahni hmasialna leh kan ngaihtuah thui loh vang a ni. Tunah chuan kan Aizawl khawpui berte hi boruak bawlhlawh leh khawlum lutukin min tibuai ve ta reng mai. Mihring kan pung zel dawn a, thing leh mau te, luituite kan humhalh loh chuan hei aia boruak lum leh chhia hi kan la hmabak dawn chauh a ni. Mi ramah te luitui an humhalh tha a, sangha lian tak tak leh khawi chawp ni lo han hmuhte hian a hmuhnawmin a hlu a, a sa lah a hriselin a tui bawk. Mizoramah pawh khaw thenkhat an ram luitui humhalh tlattute avangin sangha tam tak tak te kan hmu a, a hmuhnawm pawh kan ti viau lawi si. Nghakuaia sangha man theih hun te an han siam a, kan bawh ruih ruih lawi si a, sum lah kan seng hreh hauh si lo. Chutih laiin kan luitui tam berah sangha hmuh tur a awm lo va, turin kan hrai hreh lova, bomb leh generator nen a ruka man talh kan tum leh lawi si a. Christian inti site hian Pathian thilsiam hi kan va han tichereu nasa em! Hnamdang pathian nung pawh ring ve lo lahin nungcha tih nat tum lovin an duat hle si a, kan kristian dan hi chu in enlet a pawimawh khawp mai.
Hmanlai kan pi leh pute hun lai chuan sa a la tam a, bakah an buh leh bal leh thlaite tichhiain an venhim a ngai thin a. Tin, khang lai hunah eitur an la ngah lo bawk a. Tunlaiah chuan eitur a tam a, sa ei tur lah duh hun huna lei tur a awm bawk a; sangha ni se, lei tur a tam em em bawk a. Tunlai naupang tam ber hian ramsa leh sava sa kan tih te hi tui an ti lo, an ei duh mang tawh lo; a vir zawk chu a upa lam zel hi kan ni. Hmanlai chuan mihring an la tlemin sa leh savate an la tam bawk a, lo tihlumin lo ei pawh ni se an thiamawmna chin a awm a, global warming leh environment-ah an la buai na hek lo. Tunlai hunah mihring kan lo pung zel a, kan ramngaw leh luituite kan tih chereu zel chuan kan ram pawh hi chenna tlak lovin ka la siam thuai ang tih a hlauhawm ta a ni. Dan phal lo va, ramngaw tichereu a, ramsa leh savate suat thin te, lui lam sangha tichereutute hi ram hmangaih lotu leh Pathian zah lotu an ni ti ila kan tisual tampui lo vang. Khawvela thing leh thlai te, nungchate hi mihringte kan nun khawchhuahna tura Pathianin engkim rel fel a lo siam leh din a ni si a.
Tunlai khawvel lum lutuk ta leh, tuilian tam ta lutukten chhiatna a thlenin, mi sang tam tak an thi a. Kan boruak bawlhlawh tawh lutuk avangin hrileng lah a tam ta bawk. Keini kristian intite hi chuan Pathian thilsiamte hi uluk taka enkawla duat tur kan ni tih hi hriat thar leh kan mamawh hle a ni. Khawvel lo lum zel leh boruak a chhiat tulh tulh avangin mithiamte pawh an mangang ta hle mai. Sik leh sa mumal ta lo lutukte hian ni tina kan mamawh buh leh thlai te thlengin a nghawng tawh a. Kan Aizawl khawpui meuh pawh tunah chuan a lum ve ta hle mai a, ni sa avanga tuarna te pawh kan hmachhawn ve tan ta. mihringten kan boruak hip ber oxygen te a tlem ta in, kan boruak bawlhlawh tithianghlimtu ber kan thing leh mau te a rem zel avangin boruak tha hip tur kan nei tlem ta hle. Chutih laiin, factory leh motor khu avangte in kan boruak a bawlhlawh tulh tulh ta si a, kan hmabak chu a eng lem lo khawp mai
Aizawl khawpui phei chu in kan in sa hnaih hlawm si a, kan thli chhia paih kan fimkhur si lo; septik tank ngawt pawh ngaihmawh tham a ni tawh. zawngtah tamlai hun phei chuan kan septik tank rim chu lui tak thin a ni. tuichhe paihna tui luankawr kan siam tha bawk si lo va, bawlhlawh paih kan fimkhur bawk si lo; khawpui boruak phei chu chhe tawh tak a ni. Kan boruak bawlhlawh lutuk tak avangin hrileng kan hriat ngai loh a pung zel a, tunah pawh dengue natna pawh kan tuar tan a, nikum 2022 ah mi 5-in an thihpui ta hial mai. ran hri lah a leng awl lo bawk nen, boruak thianghlim siam tura tan lak hi mi tin te’n kan mawhphurhna a ni. Kan ram chu mihring kan la tam loh avang leh, ramngaw kan la ngah avangin tun atanga kan inven a, kan lo pun chhoh zel hun pawha kan buai loh nan tun atanga tan kan lak a ngai. Thing leh mau tihchereu kawnga kan fimkhur a, kan luitui humhalh kawngah tan kan lak thar a, nungchate ti rem lo zawnga hma thar kan lak zel chuan kan ram chu kan la venghim thei a ni. Pathian thilsiam tinrengte hi duat taka enkawla humhalh that hi keini kristiante mawhphurhna pawimawh, chanchin tha kan hrilhna pawimawh tak pakhat a ni tih i hrereng ang u.