Rualbanlote Ni hmang

Rualbanlote Ni hmang
December 3 kha khawvel huapin Rualbanlote Ni – International Day of Persons with Disability a ni a. Mizoramah pawh hmun hrang hrangah hman niin, Aizawlah chuan Social Welfare department, SELCO Foundation bakah ALIMCO leh NILD (National Institute for Locomotor Disabilities) tangho buatsaihin hman a ni.
Hmanpuitu Social Welfare minister Lalrinpuii chuan, sawrkarin vantlang hmun chu awlsam zawka rualbanlote an chet ve theihna turin a ruahman zel tih a sawi a. Ram pum huapa infiamna lamah Mizoram aiawh rualbanloten lawmman an la thei chu chhuanawm a tih thu sawiin, vohbikte chu theihtawp an chhuah phawt chuan eng kawngah pawh sang tak an thleng thei tih inhrereng turin a chah.
Hmanpuitu dang Mizoram State Commissioner for PwDs Vanlaldiki Sailo pawhin vohbikte chu khawtlang tana mi tangkai ni tura inbuatsaih turin a chah a. Mahni inhmu hniam ngai reng reng lo tura fuihin, sawrkar, kohhran leh khawtlang chu an lama tang tlat, hma an sawnna tura theihtawp chhuahpui turin an inhuam tih hrereng turin a chah a ni.