Rualbanlote Ni hmang

June 18 kha Mizoram Presbyterian Kohhran chuan ‘Rualbanlote Ni’ atan a hmang a. Hemi denchhen hian hmun hrang hrangah hun hman a ni.
Mizoram sawrkar hnuaia Persons with Disabilities commissioner Vanlaldiki Sailo chuan Venghnuai Presbyterian Kohhran Chawhnu Tleirawl Inkhawmah hun hmangin, ri hriatna leh tawng lama harsatna nei naupangte luhna – Ephatha Special School zirlaiten tawiawmin item an nei a ni.
Kulikawn West Presbyterian Kohhran Chawhnu Naupang Inkhawmah pawh vohbikte zirna school – Shining Star Special School principal Zonunmawii chuan hun hmangin, he school naupangte hian special item an nei ve bawk.
Mizoram Presbyterian Kohhran June thla Pathianni vawi thumnnaah Rualbanlote Ni hi a hmang thin a. Thupui thlanbikte a nei thin a ni.
Mizoram sawrkar hnuaia Persons with Disabilities chhinchhiah danin, state pumah rualbanlo kum 1 atanga 90 inkar 15160 an awm a, heng zinga 8198 hi mipa niin, hmeichhia 6962 an ni. Tul hrang hranga an hman theih tur unique disability identity card (UDID) nei 4293 an awm. India sawrkar chuan rualbanlote hamthatna tur dan leh ruahmanna hrang hrang siamin, hemi ang hian Mizoram sawrkar pawhin hma a la chho mek a, tihhhlawhtlin tawh engemawzat awmin, hmabakte tih chhoh mek a ni a. Rualbanlo zingah zirna leh eizawnna kawng zawh chho mek engemawzat an awm tawh bawk.
“Rualbanlote hian huaisen taka khawvel an hmachhawn theihna’n kaihruaitu an mamawh em em a. Heng kan unaute hi thih hnu chauha chan tha chang tur niloin, he khawvela an damchhung ngei hian an dikna chanvo hriatsakin humhalh pui theuh ang u,” PwD commissioner Vanlaldiki Sailo hian a ti.