Aizawl tui tlan Tlawng lui a nu leh

Tlawng lui a nu leh a, hman tlak a nih loh bakah tui hi lak (pump) chi loh khawpin a nu. May thlaah khan hetiang hi a lo ni tawh a, June thlaah pawh lak tlak loh khawpin a nu leh.PHE department hotute sawi danin, thla hmasa khan Tlawng lui hi a lo nu vak tawh a, tun thlaah ni 14 atanga ruah surah khan a nu leh vak. Tui hi lak tlak loh khawpa a nut avangin mipuite pawh tui ren turin Inrinni khan an ngen a ni.
Tlawng tui hi ni khatah litre maktaduai 30 vel pump ta se, Aizawl mipui tana hnianghnarna khawp a tling lovah ngaih a ni a, June ni 14 khan litre maktaduai 29.46 an pump. Hemi ni hian a nut avangin an pump hnem lo.
A nut zual zel avangin a tukah pawh an pump hnem lo a, ni 15 khan litre maktaduai 20.56 chauh an pump. Ni 16-ah phei chuan litre maktaduai 6.96 lek an pump. Chutiang a nih avang chuan, tui hi pump hnem theih tur khawpin engtikah nge a fim ang tih a hriat si loh a, tui ren turin mipui an ngen ta a ni, PHE department hotute chuan an ti.
PHE department Aizawl Circle hotute sawi danin, mipui hnena tui sem tur hi NTU (Nephelometric Turbidity Unit) 5 hnuai lam a ni tur a ni a, Tlawng lui tui hi NTU 100 pawh ni se an pump tho a, NTU 5 tling lo turin pump hnu-ah an tithianghlim thin. NTU 500 te, NTU 600 te, a aia sang te a ni fo a, chung chu an tithianghlim mai thin. Tunah erawh NTU 1000 a pel dawrh dawrh a, chuvang chuan pump chi-ah an ngai ta lo a ni.
An sawi danin, NTU 1400 te a kai a, NTU 1500 te pawh a kai. A chang phei chuan a tehna khawlin a teh phak loh khawpin a nu a, a tehna khawlah ‘error’ a inti hial thin. Chutiang chu tunlaia Tlawng nut dan a nih avangin, tui chu tam pawh ni se pump chi a nih loh avangin an pump tam thei ta lo a ni.
Tlawng lui tinutu ber chu leivung paih leh bawlhhlawh paih a nih thu an sawi a, mahni thua Tlawng bul vel leh Tlawng fintu lui velah leivung leh bawlhhlawh paih an awm thin thu sawiin, chu chu mipuiin an tuar tih an sawi.
“Tlawng kama leivung paih hi an awm a, Tlawng fintu Serlui kama paih pawh tun hnai thlengin an awm. Leivung bakah bawlhhlawh paih thin an awm a, motor-in an phur a, inthlahrung lo takin lui kamah te an paih mai a, plastic te hi a tam a. Hetia kan lui kan tihnut hian a tuartu chu keimahni tho kan ni a, inven sen a ni lo a, mipui hi kan harh a tul khawp mai,” tiin PHE department hotu pakhat chuan The Aizawl Post a hrilh.