Ruang hmuh tawh 27, la hmuh loh 7

Cyclone Remal vanga Aizawl leh a chhehvela nunna chan chu mi 34 nia hriat an ni a, an zinga 7 hi an ruang la hmuh loh a ni. He chhiatnaa nunna chan hi Thawhlehni lam thleng khan, mi 30 an chuang tih bak a zat hriatchian theih a ni loa, mi 38 thleng pawh kai thei nia hriat a ni. May 29 tlai lam thlenga sawrkarin a hriat theih chinah nunna chan hi mi 34 an ni a, an zinga 27 chu an ruang lakchhuah tawh a ni a, Thawhlehni thleg khan mi 25 ruang lakchhuah niin, Nilaini khan mi pahnih lakchhuah belh a ni a; mi 7 zawn a la ni.
Nilaini hian Central YMA bultumin ruang zawn hna hi thawh a ni a, YMA branch thlan bik bakah Central YMA hnuaia Disaster Response Team, State leh National Disaster Response Force, Fire & Emergency Services leh 1st Bn. MAP an chechhuak a ni.
Falkawnah ruang pakhat leh Melthumah ruang pakhat lakchhuah niin, Nilaini zan dar 6.23 khan ruang zawn hna hi tawpsan rih a ni a. Hlimenah 1, Melthumah 4, Aibawkah 2 ruang la hmuh loh an awm nia hriat a ni.
Thudawn danin, chhiatna thlenna hmuna ruang zawng tur hian Lunglei atangin Border Security Force ho uisathiam (sniffer dog) pahnih thawhchhuah pui an ni a, kawng lakah leimin a tam avangin Nilaini chawhnu lam thleng khan ruang zawnna hmun hi thlenpui theih an la ni lo tih sawi a ni.
May 29 chhun thlenga DM&R department chhinchhiah danin, Cyclone Remal vang hian Mizorama khaw 167-ah chhiatna a thleng a. Aizawl district-a hmun 59, Lunglei district-ah hmun 30, Siaha district-ah 9, Champhai district-ah 12, Kolasib district-ah 8, Serchhip district-ah 11, Lawngtlai district-ah 8, Mamit district-ah 11, Saitual district-ah 10, Khawzawl district-ah 5 leh Hnahthial district-ah hmun 4-ah chhiatna hrang hrang – leimin, in hnawl, thli in inchung rangva a hawk, thing tlu in in a delhchhiat, kawng ping leh adt. a thleng a ni.