Ruang phurhna man bill 91 lut tawh

Ruang phurhna man bill 91 lut tawh
Mizoram sawrkarin ruang phurhna man tum sak tura a tih hnu ah tun thlengin ruang phurhna bill lut 91 a awm tawh a, an la dawn belh zel tih sawi a ni.
Social Welfare minister Lalrinpuii chuan khawpui zawk atanga thingtlang lama ruang phurh chu thil buaithlak tak, bialtu MLA emaw tu emaw in a tum thin avangin a hautak a, ZPM a sawrkar chuan sawrkarin mawhah a la ang, tia an lo sawi lawk tawh angin ruang phurh man hi sawrkarin a tum turin sum dah a ni ta tih a sawi a. Kumin September 1 atang khan hmang tanin, kalchilh zel ngai (manual) a lehkha thehluh chu mipui tan a buaithlak avangin Mizoram State e-Governance Society nen tangdunin online-a thehluh a, bank account kaltlanga ruang phurhna senso pek a nih theihnan hma lak mek a ni tih a sawi a ni.
Social Welfare joint secretary Zonunthari chuan ruang phurhah mipui tana awlsam tur an zawng ve zel a. Damdawi ina thi an nihin doctor duty hriatpuina, in lama thi an nihin VC/LC/ YMA adt hriatpuina a ngai a, thil engemaw hetiang hi phut neih ve loh chuan thil dik lo tih palh theih a ni tih a sawi. Tunah hian Finance department atangin cheng vaibelchhe 5 sanction an hmu tawh a, lakchhuah phalna dil mek niin, ruang phurh manah hian sum pekchhuah a la awm chiah loa, mi 91-in bill thehlut tawhin, a la luh belh zel tih a sawi.
Tunah rih chuan bialtu MLA te emaw in ruang phurh man hi an lo peksak rih mai a, re-imbursement ang deuhin a hnu ah pek leh mai tur a ni tih a sawi. Ruang phurtu lirthei neitute nen emaw empanel list siamte pawh ruahman tum a ni tih a sawi bawk.