Ruang phurtuten ruang phurh dan turah chinfel hmasak ngai an hmu

Mizoram sawrkarin ruang phurh a tum danah a rate hman tur leh a phurh dan tur kaihhruaina siamah thil chinfel hmasak ngai an hmu a. Chinfel hma chu association ang chuan sawrkar rate ang ni lo, anmahni rate neihsa anga tlan zel phawt an tum.2024 September 1 atanga Mizoram sawrkarin ruang phurh man a tum turah State Transport Authority-in rate a siamsa chu hman turin a ti a. Hemi ang chuan, lirthei cheng nuai 7 aia sang lo an hmanin, km khatah Rs.25 zel hire-na man a ni a, up-down chuan Rs. 50 tihna a ni. Nuai 7-12 inkar man litheiah km. ah Rs. 30 (total Rs.60) niin, nuai 12-17 inkar man lirtheiah km ah Rs.35 (total Rs.70) niin, nuai 17 man hi man chawia ruang phurhna atan STA chuan hman a remti lo a ni.
Mizoram Private Ambulance Association (MPAA) an ding a, Aizawlah member 12 vel an awm tawh. An member zingah Central YMA ambulance leh Fairland Medical Help+Line an tel ve lo thung. The Aizawl Post zawhna chhangin MPAA president CVL Ngheta chuan sawrkarin ruang phurhna inkaihhruaina a siam chu an la zirchiang famkim lo deuh a, chuti chung chuan STA rate anga tlan chu an thei lo thung tih a sawi. Tuna an rate hman lai chu km. ah Rs. 40 (total Rs.80) a ni. Hei bakah hian ruang phurhna re-imburse tur a nih a, anmahni’n office-a bill an buaipui zui kha hna chuangah an ngai tih a sawi a ni.
Central YMA chuan rate hran a nei a, chutihlaiin an ni chu an lirthei hi donate-te a nih avangin a zia a, association member zingah loan-a lirthei la te an awm a, mahnia kal vek remchang lo a nih avangin ‘spare driver’ an hruai chang a awm bawk a, an ni hlawh nen vek chuan rate hi a hniam lutukah an ngai tih a sawi.
“Social Welfare minister hmuh kan tum a, kan duh dan kan thlen ve anga, sawrkar chuan kan chhiatna khawp tur chuan min siamsak kan ring bik lo,” MPAA president hian a ti.
Thudawn danin Central YMA ambulance hi km ah Rs. 30 (total Rs.60) in a tlan a. An ni chuan an rate ang hi tih sawn an tum hran loa, tunhnaia oil man sang chu rate tih chet phah nan hman an tum lo tih sawi a. Fairland lam chuan tuna an rate hman mek chu a la tha tawkah an ngai a, oil man sang chu an rate tih chet phahna turah an ngai lo tih an sawi.
Ruang phurtute hian sawrkarin ruang lakna atanga rate hi chhiar tan tur, tia a dah pawh chu chiang zawka tihfel ngai nia an hriat thu an sawi bawk.
Sawrkar hian up down-a Rs.65 emaw rate tihsan rawt a tum nia sawi a ni a. Social Welfare department hotute chuan kaihhruaina hi an siam naa, tih that leh thlak kual theih a la ni tih an lo sawi tawh a ni.