Rubio-a’n tuikawng an kalpui dan thlak thuai turin Panama ti

Rubio-a’n tuikawng an kalpui dan thlak thuai turin Panama ti
US Secretary of State Marco Rubio chuan Panama hnenah Panama Canal-a Cina ‘inrawlh lutuk leh thununna’ chu rang taka kal dan thlak nghal turin a ti.
America palai lawk ber chuan Panama hian hma a la lo a nih chuan US-in ram pahnihte inkara inremna ziah tawh angin a dikna humhim nan hma a la mai dawn niin a sawi.
President Donald Trump-a chuan he tuikawng hi lak letah a lo vau tawh a, Pathianni khan hemi chungchangah hian Rubio leh Panama President Jose Raul Mulino te chu Panama City-ah an inkawm a ni.
Hruaitu pahnih hi darkar hnih chhung zet an inkawm a ni.
Mulino-a chuan US hian sipai chakna hmanga tuikawng lak tumna a neia a hriat loh thu thuthar lakhawmtute hnenah a sawi a, Trump-a’n Chinese an inrawlh thuk lutuk nia a sawi chungchangah hian technical-level-a inbiak a rawt tih a sawi.
Trump-a’n tuikawng lak let mai a tum thu a sawi hi Panama-ah chuan duh lotu an tam hle a. Panama City-ah hian Zirtawpni pawh khan mipui thinrimin Trump-a leh Rubio-a lim an hal.
Hmun dangah pawh police-in pungkhawmte an hnawh darh hian a ngai a, tear gas nen an innawr nasa hle a. He thil thleng hi liantham ni lo mah se US president ngaihdan hi an duh lo hle tih erawh a lang.
Ningania khan Mulino-a hian tuikawng neitu chungchang chu Rubio-a nena an inbiaknaa an sawi tur a nih loh thu a lo sawi tawh a. “Insiam remna emaw, kal dan thlak tura inbiak emaw ka thei lo, he tuikawng hi Panama ta a ni,” a ti.
Trump-a hian president-a lak luh a nih tuma thu a sawiah Chinese sipaiten tuikawng hi an enkawl nia a sawi chu finfiahna awm a ni lem lo va. Inremna an siama tar lan vek ni siin American lawng liante chu dik lo taka ti bikin mi dang chawi zat aia tam chawitir an ni thin niin a sawi bawk.
Kum tam tak kal taa inremna an ziah angin tuikawng neitu leh a enkawltu hi Panamanian sorkar chu a ni ngei a. Hetih mek lai hian Chinese company-ten a bul lawngchawlhna leh terminal-ah sum an vawm nasa hle a. Hong Kong-a hmunpui nei company-in a luhna bula lawngchawlhna pangaa pahnih chu an thunun mek.
US leh Panama hian kum 1979 khan inremna ziakin zawi zawiin tuikawng hi Panama kutah an hlan a, kum 1999 khan an kutah a pum puiin a awm tan.
Trump-a hian inremna ziah anga hma lak a tumnaah sipai chakna a hmang mai thei nia ngaihna hian Panama-ah chuan hlauhna pawh a siam a. Kum 1989-a US-in Panama runa roreltu, General Manuel Noriega a paihthlak ang pawh kha a thlen leh mai hlauhna a awm.
Panama hi kawng dang tam taka US thawhpuitu tha a ni a, Rubio-a’n a tlawh pawh hi Chinese lian zelin an inkungkaihna a tihhlat hret hret tihhnaihna tur pakhata ngaih a ni bawk.
Panama-ah hian China hian lawngchawlhnate a thunun nasat avangin US sumdawng leh indo lawngte a dang thei mai dawn niin a sawi.
“China hian Panama Canal veivahna hi a duh chuan a dang mai thei a. Chu chu President Trump-a’n a sawi chhuah kha niin chumi chungchang tho chu ka aupui hi a ni,” tiin kar hmasa khan The Megyn Kelly Show-ah a lo sawi tawh.
Panamanian tam zawkin Trump-a thil sawi hi duh lo mah se eng emaw zat chuan an hruaitute chet dan chu an duh lo ve tho va, tuikawng atanga hlep awmte chu Panamanian mi naran kut a thleng phak lo niin an sawi.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More