Tui lian vangin Australia-ah mi sang telin in chhuahsan
Australia-a Queensland hmar lama ruah tam tak sur avanga tui lianah hmeichhe pakhat a thi a, mi sang telin an chenna in an chhuahsan phah bawk.
Thuneitute chuan tui chim chin hi a sang zel dawn a, ‘a hlauhawmin nunna atana hlauhawm’ a ni thei tih an sawi.
Zirtawpni atang khan Queensland hmarchhakah hian ruah mm 1,000 chuang a sur tawh a, Queensland State Premier David Crisafulli chuan Thawhtanni thleng ruah hi a la sur dawn tih sawiin ‘ruah sur tam ber record’ a ni thei dawn tih a sawi.
Khaw chin zirtute pawhin tun tuma tui lian hi helai hmuna kum 60 chuang hnua a nasat ber tum a ni thei tih an sawi lawk.
Crisafulli-a chuan Queensland hmar lam chuan hun rei tak a tawn ngai loh tawng dinhmunah a awm niin a sawi.
“A nasa mai pawh a ni lo va, a rei em em bawk a ni,” tiin Australian broadcaster ABC hnenah a sawi.
Hmeichhia hi hi Queensland hmarthlanga Ingham khuaah niin thing tluin a vuak vang niin State Emergency Service (SES)-in an phurh laiin a thi a ni.
Amah hi mi dangte nena an chhanchhuah zinga tel niin emergency worker a ni lo va. Mi dang panga erawh an him a, an chetsual dan hi chhui mek a ni.
Hetih lai hian Cairns leh Townsville inkar, Cardwell-ah in chunga tang mi pathum chhanchhuah an ni.
Video darh pakhatah mi pakhat chu tuiin a car a chim avangin banah a lawn a, ani hi tual chhung miten lawnglengin an chhanchhuak.
Townsville Local Disaster Management Group chuan an khawpuia in 1,700 chuang chu tuiin a chim avangin tlawhpawh theih an ni lo va, tui hian in chhawng hnihna vel thleng a chim hlawm.
Townsville chhehvel khaw paruka chengte chu Pathianni chhun khan an in chhuahsan vek turin tih an ni a, thuneitute chuan an zinga 10% chuang erawhin chhuah loh an duh thung tih an sawi.
Heng lai vel hi kum 2019 khan tui lianin a lo tibuai chiam tawh.
Premier Crisafulli-a chuan mipuite chu inralrinna pek ngai pawimawh turin a ngen a, “In te, car leh bungruate chu thlak theih a ni a, i chhungte erawh thlak theih an ni ve lo,” a ti.
Pathianni zan khan mahni in chhuahsante awm khawmna tur, evacuation centre hawn a ni a, a hmaa mi chu a khat tawh.
Townsville leh khualzin tlawh nasat thin, Cairns inkar kawng chu a ping rih a, chhanchhuah hna thawktuten tihtlang tumin an bei nghal mek a. A tuar na zual hmunah sandbag sem a ni bawk.
Townsville tumhmun pawh Thawhtanni tuk thleng atan khar a ni a. Supermarket-ah chuan ei tur tharlam a awm tawh lo va, in tam takin power an nei lo va, Ingham leh ram leilung fate chenna hmun, Palm Island-ah pawh power a awm lo.
Mi chengte hi an chenna hmun atangin tuiin awle a len chhuah theih avangin fimkhur turin chah an ni bawk.
Queensland hmar lam hi a awmna hmunin a zir avangin khuarel chhiatna hrang hrang – cyclone, storm leh tui lian thlen tamna hmun a ni a. Climate scientist-te chuan tuipui tui lum leh khawvel lum zelah hian heng thil thleng thin hi a na zual sawt zel niin an sawi bawk.
Tui lian vangin Australia-ah mi sang telin in chhuahsan
Get real time updates directly on you device, subscribe now.
Prev Post