Kum khat chhunga Mizorama ruihhlo man chhuah a pun deuh hluai tan 2018 kum khan heroin Kg 8.7 man a ni a. Kum 2020 khan Kg 11.7 man a ni bawk a. Kuminah hian March thla thlenga heroin man chu Kg 9.7 a tling leh tawh bawk.
Kum khat chhunga heroin man chhuah pun chhoh dan atanga chhut hi chuan, 2018 kuma heroin man aiin kumin thla thum chhunga heroin man a tam tawh zawk a; kumin thla 3 chhunga heroin man hian kum 2020-a heroin man zat a tluk thuak bawk.
Kum 2018-a heroin man zat leh kumin thla 3 chhung lek chhunga heroin man tawh zat atanga chhut hi chuan, kum li chhungin a let liin heroin a pung tiin a sawi theih a. Kuminah thla 9 kan la hmabak a, hemi chhung hian heroin engemawzat chu man a ni leh ngei ang a; 2023 kan hman zawh meuh hi chuan ruihhlo hluar dan hi a let sawm aia tam pawh a tling hial thei awm e.
Hetih lai hian, Mizoramah heroin tam tak man chhuah thin ni mah se, heroin ti thar an pung hluai tihna a ni chuang lo a, Mizorama heroin an manah hian Mizoram pawna ken tur a tam tih sawi a awm bawk a. Hei hi survey rintlak deuh behchhan ni lovin rinthu deuh a nih a rinawm a. Tun hnaia zirbing miten kumtlinglo zinga ruihhlo tih ching an pun chhoh dan report an siam atang hi chuan, ruihhlo ngai hi an tlahniam hauh lo tih a sawi theih a ni.
Heti zat heroin manchhuah tur a awm hi chuan, man chhuah loh hi a tam zawk fe a ni thei tih a lang a. Heti zat ruihhlovin kan ram min luhchilh reng na na na chuan, ruihhlo tih ching pawh an pung ve zel ngei ang tih a rinawm a. Ruihhlo tawlhna kawngpui (drug transportation corridor)-in a paltlang kan nih miau tawh chuan ralkhel dar hi ring taka khawn rik a ngai a; tuna kan dinhmun mek han thlir hi chuan, ruihhlo do hmalakna kalpui mek hi chu a la nep mah mah niin a lang.
Ruihhlo-ah ralkhel dar ….
Get real time updates directly on you device, subscribe now.
Prev Post
Next Post