By RK Dawla
Mb 9366095658
-- Advertisement --
1. April ni 16 kan lo thleng ta reng mai. Ruah a sur châwl rei ta deuh a, khua a lumin khuhtu hnim awm lohna leilung chu a ro tawh viau thin. Hetih lai hian, nature-in a ken thilto chi hrang hrangte chuan khua a ro tih rêng hre lovin, chawr hring an chhuah hlep hlep thung a. Kawngkam phûl ilo rawn chawr pawh a hring nalh êm êm thung. Chutih laiin duat taka kan thlai chinte erawh, tun ang khaw sâng takah chuan, tui pêk loh chuan an damkhawchhuak thei mang lova. A dam chhunte pawh an hrisel lovin, rannung chaw-chah mai an ni thin.
2. Thlai kumhlunte hian tun ang thal chârah pawh chawr hring no nalh tak an chhuah tlat theihna chhan hi chi thumin kan sawi thei âwm e. Pakhatnaah chuan lei kha siamtu duan anga la inrem, lehphut leh khawih buai loh a ni a. A thawlêng nêp a, lei mûr kâra tui awmte kha chunglam boruakah an chhuak zung zung lo tihna a ni. Pahnihnaah chuan, fungi tangkai vâng. Fungi (hmuar hrik) kan tih hi chi hrang hrang an awm a. A tam zawk ngial chu thlai tana tangkai, chaw leh tui supply-tu an ni a. Fungi kan tihho zingah pawh, Mycorrhizal fungi-ho kha an pawimawh zual thin. Heng fungi tangkaite hi lei khawihchêt lovah chuan an tam thin a. Heng fungi tangkai vang hian thlai zung a thui phah a, thal khaw ro lai pawhin lei thûk zawka hnawng kha thlaiin a ei pha ta thin a ni. Pathumnaah chuan khuanu duan thiltote hi chuan an chi chhungah khan anmahni puitu hrik (fungi & bacteria) tangkai an keng tel thin a. An lo tiah tan atangin puihna an hmu tan nghal thin.
3. Kan sik leh sa lo danglam chho zelah hian, kan rama lo khawsa tlangnel tawhsa (Indigenous plants)-te kan hlut thiam a tul chho hle a. A then chu khawvel ramdanga awm ve ngai lote pawh an ni ang. Hengho phei chu kan hlut lehzual a, khawvel mithmuha kan vawrhlar hial a tul hle. Mi rama an chin ang chawlût ringawt lovin, kan neihsate zirchian a, an hlutna dapchhuah kha kan kovah a innghat tak meuh a ni. Heng kan tualto thlai leh hnimte hian, kan ram leilung an mil thiam êm êm tawh a, kan ram sik leh sa lakah an chhelin, lei hrik tangkai chi hrangte nên pawh an thawkho tha bik êm êm. Hei vang hian an rah hlawkin, natna leh eichhetu rannung lakah pawh an him bik ngei ngei thin.
4. Thei huan kan intih-hmuh chho zel a. Tun ang hun laia hnim hringin huan leilung a khuh kha a hlu êm êm. A chhan chu, heng hnimte hian nisa leh ruah lakah leilung chhe zel tur te, kalral turte an vêng a. Hei mai ni lo hian, heng hnim hringte hian khua tilumtu boruaka carbon awmte kha, thil sakhatah chantirin leiah a chhêk khawl thin. He carbon sakhat hi kan thlaite châwmtu, hrik tangkai chenna leh tui chelhdingtu an ni lehzel a. Chuvangin, kan huan leilung khuh tura hnim bet, thal laia rawn chawr hring thinte hi hmelma ni lovin, tanpuitu zawk an ni a. An nihphung kan hriatthiam a hun ta hle. Tin, hnim chi 2/1 maiin kan huan leilung khuh lova, hnim chi hrang hrangin a khuh kha a tha lehzel a. A chi hrang a tam poh leh kan leilung a insiamtha chak tihna a ni thin. Heng hlobet chi hrang hrang inpawlhin leilung an khuh hneh viau chuan, ruahpui leh rial pawh rawn thawk sela, lei kha a him a. Tin, tuihna siam turin ruahtui tam tak lei chhungrilah a lût thei ta a, lei chunga tuihâwka luang dûl dûl lovin. Heng tui lûtte hi ruahsur loh kâra lei hnawnnna siamtu tur leh tuihna siamtu hnar ber an ni leh thin. Kan ram hi kan hmangaih a nih chuan, kan ram leilung tuamdam tura khaunu thilthlawnpêk hnim leh thilto awmsate hi an tangkaina i hmu thiam teh ang u.