Ruihhlo do hi kan agenda tih hlawhtlin turah dah ang – Dy CM

Ruihhlo do hi kan agenda tih
hlawhtlin turah dah ang – Dy CM
Mizorama chhungkaw tinten ruihhlo do chu kan mawhphurhna, kan agenda-ah dah theuh a tul tih deputy chief minister Tawnluia chuan a sawi.
International Day Against Drug Abuse and Illicit Trafficking ni pualin Thawhtanni khan Aizawlah hun hman a ni. Kumin thupui chu “Mihring ngaihven hmasak: Thinhrikna leh thliarhranna tihtawp a, invenna tihchak” tih hman a ni.
He hun hmanpuitu deputy chief minister Tawnluia chuan ruihhlo laka inven hmasak chu tih makmawh a ni, tiin, a la khawih ve ngai lo ten an khawih ve lohna turin chhungkaw tinah bul tan turin a chah. “Ruihhlo donaah chhungtinten mawhphurhna kan nei a, kan agenda tihhlawhtlin turah dah theuh ila, chutianga kan tih theuh chuan nasa takin ruihhlo do kawngah kan hlawhtling thei ang,” a ti.
Kohhran, YMA leh NGO dangte, department leh mimal, ruihhlo do kawnga theihtawp chhuahtute fakawm a tih thu a sawi a. Chief minister kaihhruaia din Ruihhlo Do Core Committee chungchang sawiin, ruihhlo do beihpui thlakna’n chief minister-in cheng vaibelchhe 3 a sanction chu tangkai taka hman mek a ni tih a sawi.
Excise & Narcotics miniser Er. Lalrinawma pawhin thu sawiin, ruihhloin Mizoram a run nasat avangin sawrkarin ralkhel dar a vua a ni ber, tiin, tan lak a ngaih nasat zia a sawi a. State level-ah Ruihhlo Do Core Committee dinin district tinah DC-te kaihhruaina hnuaiah Committee din a ni a, theihtawp chhuah a ni tih a sawi. Ruihhlo avanga Mizo thalai, a bikin mipa tam takin mual an liam chu pawi a tih thu a sawi a. Tunhma huna Mizo mipate ropui zia leh khawtlang, chhungkaw tana an tangkai zia te, mahni nunna thapa ram leh khawtlang tana tang thin an nih zia te sawiin, mawhphurhna la ngam, Mizo mipa dik takte penchhuak turin a sawm tih a sawi.
Khawvel pum huap ruihhlo dona ni – International Day Against Drug Abuse and Illicit Trafficking atan United Nations chuan June 26 a lo ruat tawh angin Mizoram pawhin he ni hi kum tin a hmang a. Ruihhlo hmansual that loh zia, ruihhlo tawlhruk hlauhawm zia, ruihhlo ngaih avanga mimal, chhungkua leh khawtlanga chhiatna thlen dan inzirtirna atante hman thin a ni.