ASF-in Aizawl thleng tawh

Mizoramah African Swine Fever (ASF) a leng mek a, he hrileng hian Aizawl pawh a thleng tawh. Amaherawhchu Mizoramah he hrileng hi a nasa rih lo hlauh.AH&Vety department atanga thu dawn danin, chawlhkar liam taah khan ASF vang hian Aizawlah vawk pakhat a thi a, a bul hnaia vawk panga tihhlum a ni bawk. Vawk dang erawh ASF vanga thi an awm rih lo.
May vel atanga he hrileng hi Champhai District-ah an hre hmasa a, Champhai, Kolasib leh Mamit district-tea hmuh a nih hnuah Aizawlah hmuh a ni ve leh.
AH&Vety department hotute chuan vanneihthlak takin he hrileng hi a nasa rih lo a, a darh chak loh bakah a darh nasa rih lo tih an sawi.
June ni 26 thlenga an chhinchhiah danin, ASF vang hian vawk 170 a thi tawh a, vawk 187 tihhlum (cull) a ni tawh.
A tuar nasatu Champhai district-ah he hrileng hi a zia tan a, ASF finfiah tawhna district dangah pawh a hma angin a nasa rih lo, AH&Vety department hotute chuan an ti.
Aizawl khawpuiah a nasat loh an beisei thu an sawi a, tuna a lan dan chuan Aizawl district-ah he hrileng hi a nasa vak dawn lo niin a lang tih an sawi bawk. Amaherawhchu, thil sawilawk theih a nih loh thu leh, ni khat leka danglam thei a nih thu an sawi tel.
2021-ah khan ASF hi Mizoramah hmuh a ni a, kum tir lam atangin 2022 February thlengin he hri hi Mizoramah a leng. 2022-ah hian a thawh hnihna a leng leh a, December ni 22-ah a tawp tiin an chhinchhiah. Kuminah a thawh thumna a leng leh a, kumina an finfiah hmasak ber chu May ni 6-a mi a ni.