Ruihhlo do nan ruihhlo ngaite

Tunhnaia Mizoram Police leh MSACS tangkawp ten ruihhlo bansan tawhte leh ruihhlo ngaite puala inkawmhona an buatsaihah, ruihhlo lo ti thin nghei tawh ten, ruihhlo lakah an talchhuah dan, ruihhlo an nghei nana anmahni puitu nia an ngaih thenkhatte an sawi a. He inkawmhona hian rah tha tak a chhuah thei a, chu chu awmze nei taka bawhzui a pawimawh dawn ta niin a lang.
Tunhma atang tawhin ruihhlovin min tihbuai em avangin YMA pawhin ruihhlo do beihpui a lo thlak tawh a. Kha ruihhlo do beihpuiah khan hmalakna tha tak tak kalpui niin ruahmanna fel tak siam a ni a. Chung zinga a langsar zual chu supply reduction leh demand reduction kha a ni awm e. Mahse, tun thleng hian heroin leh meth man a nih thu chanchinthar lamah hmuh tur a la awm ta reng a, ruihhlo manchhuah pawh a tam tual tual nghe nghe. Hei hi, a chhan nia lang pakhat chu, kan state ralmuanna denchhen hian ruihhlo tawlhru thinte hian a kalka bera min hman tak vang a ni bawk awm e.
Ruihhlo bawih ata talchhuak tawhte hian ruihhlo an nghei nana anmahni puitu nia an sawi pakhat chu OST (Opioid Substitution Therapy) a ni. Hei bakah hian Kohhran belh, hun awl hnawh khah nana khawtlang leh Kohhran thil tih leh programme siama tel tam leh, midang tanpuina an mamawh thin niin an sawi bawk.
Ruihhlo bansan tawh ten an bansan theih chhan an sawi point hrang hrangte hi ruihhlo ngai mekte laka hmalakna tur pawimawh a ni tih a lang nghal a. Ruihhlo hluar zel tur do nan chuan ruihhlo ngai tawhten an bansan theih nana beihpui thlak ve thung hi kan kalpui theih a hun tawh hle a. Chutih rualin, thalai thang mekten ruihhlo an tih ve lohna tura beihpui thlak pawh a pawimawh bawk.
Ruihhlo man chhuah tuma thapui kan chhuah ang tho hian, ruihhlo ngaite chhanchhuah hna leh ruihhlo la ngai loten ruihhloa an inhnamhnawih loh nana beihpui thlak hi kan kalpui ve a, ruihhlo do nana senso kan inhuam ang bawka senso pawh kan inhuam a hun tawh hle a ni.