Plastic Bottle leh Aizawl!

Tpa Bunghai
May ni 29 zingkarah |KP Ramthim Ni denchhenin Dawrpui thlanmuala hmun thenkhat lai thlurbingin, |KP Armed Veng South Unit member 20 rual chu plastic kaihhnawih lam thianfaiin kan hnatlang a, plastic bottle tamzia chu manganthlak tak a ni!
Save Chite lui hmalakna leh an thahnemngaihnain mi tam takin kan khawpui leh a chhehvela plastic kaihhnawih hi thianfai thin mah se heti taka tunhnaia plastic kaihhnawih bawlhhlawh tam chhan hi a bulpui leh bupuia kan insawrbing loh avangin kan tawp tawlh tawlh a, chinfel a ngai ta!
He thlanmual lûn em em mai hi Dawrpui thlanmual committee lamin uluk leh dim taka a enkawl a ni a, khawpui hmun lai li thawkhat taka a awm avang leh a chhehvela veng hrang hrangin uluk takin thingkung hlu zet zette leh a hmunhma hi an vawngin, thutna tha tak takte an siam a – thlanmualah rau rau chuan nelawm leh nuam tak a ni!
Thingkung zar daihlim hi kum upa lam atanga naupang sikul bang thlengin chawlhhahdamna’n tak hman a ni a, thalai rual phei chu tlai lamah an thu ther fur zel.
Khawpui boruak lum tlanchhiatsanna’na hmun thengthaw nuam zet a ni a – ghost hunter lam tân pawh he lai hmunah hi chuan tih tur a awm lo ta hial ve ang, plastic hunter mamawhna hmun a ni mêk thung!
Chuti khawpa vantlangin park ang ziazanga an hman ni mah se tun hnai atang khan ngaimawh tham leh nakkin lawka thlan tichim thei tur khawpa tam plastic bottle-in a bawhbuaiin a bawm nasa ta hle! Heti tak maia hnawk leh tawp a tam chhan chu Aizawl daia zu zawrh dan system inthlak vang daih a ni!
A hmunah in theih miau hek loh le!
Khawpuiah chu plastic bottle, a chhunga zu awm chu a leitute’n an rawn hawn let a, zu chu pumah, plastic bottle erawh hnawk a chang ta a nih hi!
Aizawl hi plastic bottle hmanga local zu zawrh a nih tak avangin kan vantlang hmun lunlai leh fianrial deuh apiang mai hi han belchiang deuh ila, plastic bottle a let rem rum a, tui luan kawrah thahnem fê paih a ni a, chu chu luiah thawn liam zel a ni – a rapthlakin a runthlak teh e!
Thawkhat lai khan chow funna (sarang tungut) kha zu funna’n hman a ni a, funte ruang kha hmun tin deuhthawah a thal tiar tuar thin a nih kha!
Amaherawhchu, thenfai kha a awlsam a, tuna plastic bottle erawh hi chu a tihralna tur pawh a hautak ta viau mai. Heti renga plastic bottle hi kan thlah zalen zel a nih chuan Aizawl khawpui dinhmun hi a him lo chho viau ang.
A chinfel dan awlsam ber chu a tihluartu veng lam khu tihtur tuklêt ni se, anmahni khawtlang inrelbawlna khu an chunga thuneihna awm an zawm that ber (chhiat tawk an awmin zu hralh loh tur tih dan hmangin an inphuar a, an inzuar lo mai zel!) a ni tho a – plastic bottle hmanga zu pekchhuah tawh loh tih ni se – an zawm maiin a rinawm.
An tân lah plastic bottle aia man tlawm zawk, an kumkhaw tih phung, chow pack-na hmangin an infun leh mai ang a, an hlawk zawk bawk ang. Aizawl khawpui hi a faiin a derthawng lo zui zat dâwn bawk a ni!
An thlarau lam thu leh an sumdawnna nghawng lawih zawnga chet lâk aia awlsam, keini lam tan lah thawventhlak chu – khu lam atanga thil rawn thleng khu, khu lamah bawk khuan chinfel ni se kan ti a ni e.