Ruihhlo dona atan lirthei 9 pe

Ruihhlo dona atan lirthei 9 pe
Formosa Foundation chuan Reliance Industries Ltd kaltlangin Mizorama Sub Hqrs. YMA zawng zawng (9) tana an pek 4×4 Bolero camper 9 chu Nilaini khan Central YMA hruaitute hnenah an hlan.
Formosa Foundation chairman Jonathan Lalremruata chuan lirthei hlan tur a lo pianchhuah dan a sawi a. Reliance hotu Anand Ambani nen 2025 December 8 khan Jamnagar-a an inkawmnaah, Mizoram tan enge an tihsak theih tih a zawt a. Central YMA hotute hnenah ram tana tangkai an mamawh a zawt chhawng ve leh a, ruihhlo dona atan 4×4 camper an mamawh hle tih an lo hrilh a, he thil hi a rawn thleng ta tih a sawi a ni.
Formosa Foundation hi Covid-19 len lai khan Mizoramah din a ni a, ei leh bara harsa chhungkaw 14192 tan ration an sem bakah ventilator, oxygen concentrator, PPE, mask leh school bus an lo pe tawh a, Covid -19 len lai hian YMA nen pawh an thawk ho thin tih a sawi bawk.
“Thalaiten an duhthusam umzui tur leh thil ropui tak ti turin tumruhna, theihna leh hmabak eng tak an nei tih hria in, Reliance chuan thalaite tan zirna lamah, infiamna lamah leh kut themthiamna (skilling) lamah hmalakna kalpui zel a tum a. Reliance Industries hian Formosa Foundation nen tangdunin Mizoram mipui leh khawtlang tibuaitu ruihhlo do kawnga hma latu YMA nen, Mizoram tan hma lak tum a ni,” Jonathan Lalremruata hian a ti.