Ruihhlo dona hmanrua atan niloin eizawnna atan sports – Sports minister

Mizoten infiamna chu ruihhlo dona hmanrua atana hmatheh bera hman tumna rilru paihin, eizawnna a ni tiha chiang tura kan sukthlek thlak a ngai tih Sports & Youth Services minister Lalnghinglova Hmar chuan a sawi.
Mizoram State Sports Council hminga awm, Kawnpui Football Ground phullem phah thar chu Zirtawpni khan Sports minister hian a hawng a. An ground chu sum tuakna niloin, football hmasawnna atana hman tur a ni, tiin, Kawnpui chu hmeichhe footballer tha chhuahna khua ni thei khawpa tan la turin a chah.
“Sports hi ruihhlo dona hmanrua maia ngaih thinna paih a, eizawnna a ni, tia kan rilru sukthlek kan thlak a ngai tawh a ni,” a ti.
Kawnpuia academy awm, hockey chu uar thar tura chahin, Olympic khelh theihna kawng awlsam ber pawl a ni tih a sawi.
Tuirial bialtu MLA K Laldawngliana chuan sawrkar hmasa atanga hun rei tawh tak an project tihpuitlin a nih theih nan Astro turf Demand Committee dinin hma an la tih a sawi a. Sawrkar laiin sawrkar hmasaa hna an lo thawh tawhna a kaltlangpui chu lawmawm a tih thu a sawi a ni.
MSSC Kawnpui Football Ground siam hna hi 2023 January 12 atanga thawh tan niin, kumin June 13 khan zawhfel a ni. SASCI scheme atangin a siamna tur hi cheng nuai 600 hmuh a ni a, tender chhuah a nih hnuah M/s Decor India, GS Road Guwahati thlan a ni.
Football turf phah chin area hi metre 105×64 niin, play area hi metre 100×60 a ni. Pavillion metre 18.0 x 4.5a zau, chhawng hniha sak a ni. A kaihhnawih hna hrang hrang a awm bawk.