Ruihhlo dotute hmalak dan thlirho

Narco- Coordination (NCORD) state level thutkhawm vawi 7-na chu Nilaini khan chief secretary Dr Renu Sharma kaihhruaiin neih a ni a. DGP Mizoram, IGP Intelligence, Home commissioner, Excise & Narcotics secretary, state sawrkara senior official-te, DDG (ER) Narcotics Control Bureau, DIG Assam Rifles leh DIG BSF bakah district tin DC leh SP ten inbiak hmuh theihna hmangin an chhim.
Mizoram Police, Excise & Narcotics Department, Assam Rifles, BSF leh MSACS hmalakna thlirho leh ennawn a ni a, hun lo kal zel tura ruihhlo dona kawnga hmachhawp sawiho a ni. IGP (Intel) leh Anti-Narcotics Task Force head Veenu Bansal chuan Mizoram Police leh END in theihtawp an chhuah tih sawiin, kumin May thlenga ruihhlo cheng vaibelchhe 982.5 hu man a ni tawh a, hemi kaihhnawihah case 418 siam tawh niin, mi 581 man an ni tawh tih a sawi.
DGP Anil Shukla chuan ND&PS Act hnuaia dan leh inkaihhruaina awmte chu ruihhlo do kawngah ngaihpawimawh a tul tih a sawi a. Ruihhlo kaihhnawih case chhui tur leh dan kengkawhtuten thawhhona tha neih a pawimawh tih a sawi a ni.
Chief secretary chuan law enforcement agency-te inpekna leh thawhrimna fakawm a tih thu a sawi a. Ruihhlo tih rem kawngah tha thlah loa bei zel turin a chah. District tina DC/SP te chu thla tin District NCORD thutkhawm nei tura hrilhin, hei hian ruihhlo do kawngah ke pen hona nasa takin a tih sawt a beisei tih a sawi.