Ruihhlo hlauhawm meth man hnem leh

Meth a hluar nge, man tur a tam nge, man tur an hmu fuh nge, tun hnaiah an man leh deuh mawlh mawlh a, kuminah pawh meth man thu hriat tur a awm fo mai.
Mizoram Excise & Narcotics (MEN) department-in kuminah April thla thlengin meth hi kg 44.111 an man tawh a, tun hnai kum hnih kum thum vela an man zat nena khaikhinin kg 44.111 hi a tam tham fu mai.
Kum liam ta 2024-ah khan kg 140.839 an man a, 2023-ah kg 99.506, 2022-ah kg 115.007 an man. 2021-ah an man tlem a, kg 12.268 an man. 2020-ah pawh a tlem, kg 45.547 an man.
Meth hi 2001-ah an man tan a, 2002-ah an man leh. Chumi hnuah an man ta lo vang vang a, 2012-ah an man leh. 2018-ah an man lo leh a, 2019 hnuah kum tin an la man. 2012 atanga 2017 thleng hian kum tin an man na a, a tam ngai lo; a tam ber kum, 2014-a an man pawh kg 6.930 a ni.
2019-ah khan kg 146.129 an man a, hei hi an man tam ber kum niin, a dawttu chu 2024 a ni. 2020 leh 2021-ah an man a, mahse a tam lo. 2021 atang khan an man tam.
Meth tia sawi methamphetamine hi tun hnaiah an man leh ta deuh mawlh mawlh a, mahse MEN department leh police-te chuan Mizo thalaite an la himah an ngai.
Mizoramah meth man tur a awm deuh reng na a, Mizoram pawna mi tur a lo ni deuh zel, an ti a, an man chinah Mizoram chhunga mi tur a awm ngai lo.