‘Ruihhlo lalnu’ man leh ta, Central Jail-ah dah nghal

On Feb 1, 2025 7 0

‘Ruihhlo lalnu’ man leh ta, Central Jail-ah dah nghal
Mizorama heroin tawlhluh kawnga a sulsutu zing ami, ‘Ruihhlo Lalnu’ tia hming lem an pek Lalchhanmawii @ C Mawii chu jail atanga tum hnih a tlanchhuah hnu ah man a ni leh tawh.
Thudawn danin, Lalchhanmawii hi thubuai engemawzat nei lai a ni a. Kum 2021 khan heroin gram 59.54 mansak a nih avangin Sairang Police Station-ah thubuai siamska a ni a, Central Jail-ah dah a ni. 2023 November 30 khan hmeichhe dang pahnih nen Central Jail atang hian an tlan chhuak a ni.
Lalchhanmawii leh a tlanchhuahpui Lalruatsangi hi 2024 May 12 khan Champhai district-ah heroin gram 250 vangin man an ni leh a, District Jail Champhaia tantir an ni.
2024 July 26 khan chief judicial magistrate Aizawl District chuan amah manna tur tichhuakin man nawn a ni a, Champhai District Jail atang hian Central Jail-a dah a ni.
2024 November 18 khan Champhai district-a a thubuai avang hian District Jail Champhaiah bawk sawn leh niin, 2024 December 18 khan a thurualpuite nen he hmun atang hian an tlanchhuak leh a ni.
Mizoram Excise & Narcotics hnuaiah pawh Lalchhanmawii hian heroin kaihhnawiha thubuai engemawzat a nei a. Hetah pawh hian a thubuai ngaihtuah mek a tam hle.
Central YMA hnuaia Kumpuan Sub Committee chuan theihtawp chhuaha ruihhlo do beihpui an thlak meknaah Mizo thalaite hraia an nunna an chan mekna heroin tawlhtu zinga lian ber zing ami, Lalchhanmawii @ C Mawii (44) hi ruihhlo a rawn thawn luh zui zel dan chhuizuiin kumin January 29 khan an man a. Champhai Police kutah an hlan nghal a ni.
Champhai District Jail leh Central Jail atanga tlanchhuak tawh a nih avang leh ruihhlo tawlh chungchanga a meizang hlaptu zinga ngaih a nih avang hian, pawnlam atang pawha a ruka puihna a dawn palh venthawnna a awm avang leh hetiang ‘high risk prisoner’ kawl tura Champhai District Jail hi duhthu sam lo deuha hriat a nih avangin venhimna tha zawk, Central Jail Aizawla sawn turin dil a ni a. CJM Champhai District Court chuan 2025 January 30 khan Central Jail-a dah remtiin, venhimna uluk tak hnuaia dah a ni,’ a ti.
Central YMA chuan he hmalaknaah hian Mizoram Police, Excise & Narcotics Department, Sub-Hqrs YMA Champhai leh Burma lama Mizo unaute nen thawhhona tha tak neiin, an thawhpuite chungah an lawm tih a sawi.