2023-ah cabinet minister ni tura sawmtu ka dawng – Dr K Beichhua

2023-ah cabinet minister
ni tura sawmtu ka dawng
– Dr K Beichhua
Kum 2023 khan political party pakhat atangin cabinet minister ni tura an hnena lut tura sawmna a dawng tih BJP MLA Dr K Beichhua chuan a sawi.
Mamit district an tlawhnaah BJP State Core Group member Dr K Beichhua hian, kum 2023 khan cabinet minister ni tura sawmna pawh dawng mah se, BJP a thlang ta zawk a. Harsatna nasa tak paltlang chungin Pathian leh mipui zarah Siaha bialah thlantlin a ni tih sawi. Tunhmaa politics-a a zinkawng angin, opposition MLA nih leh phawt chu a tan Pathian ruatah ngaiin, a pawm thlap tih a sawi.
Kan sawrkar hrawn mek chu sawichhiat ngawt a thiang loa, an hnathawh dan dik tak thlir a, chutah chuan thuthlukna pek turah a ngai tih a sawi. “Mipui hian buhfai, tuialhthei, kawngpui, kuthnathawktute, khawtlang dinhmun ngaihtuah ila, sum leh paiah harsatna kan tawh leh tawh loh kan ngaihtuah chian a tul. Tuna kan sawrkar hi kan enchhin mek a, la enchhin zel ang u, kan tih leh tih loh chu mipuiin kan khawtlang dinhmun kan teh dan atangin kan chhut thiam a tul a ni,” a ti.
Thenawm state Tripura-ah erawh development a zuanin a zuang mek a, Mizoram aiin mihring tam zawk mah se, hma an sawn chak zawk tlat a, BJP hlau state kan ni chu a pawi hle tih a sawi.
Mamit district ‘Aspirational District’ hi PM Modi-a’n a ngaipawimawh a, central minister-ten vawi tam an tlawh tih BJP MLA hian sawiin, “Mamit hi Pu Modi hian a ngaipawimawh a, min ngaipawimawhtu hmasawnna kan hmuh ve duhtu party BJP hi kan hnawl a thiang tawh lo a ni,” a ti.