Ruihhlo leh Zo nun ze mawi

Tun hnaia International Day against Drug Abuse & Illicit Trafficking hmanpuitu chief minister Pu Lalduhoma chuan, ruihhlo hmanga sumdawngte hian Zo nun ze mawi kan lantirnate remchangah lain, chhungkaw bungraw pawimawh anga sawiin an ruihhlo chu midang an kentir thin a, mi tha tak takin man an tawh phah a, Jail-ah te an lut…, tiin a sawi.
Ruihhlo hian chhungkua leh khawtlang a tihbuai bakah, tunah chuan hnam nun ze mawi tak pawh a luhkhung leh ta mek a, a inrawlh thuk ta hle mai. Tuna chief minister sawi ang hian, zin veivah nikhua pawhin, thil inthawn kensak mai mai a hlauhawm tak avangin, tunhmaa harsa chung chung pawha “Ka lo kensak mai ang che” tih ang kha rilru sual vang ni miah lovin “Ka keng thei lovang” tih a lo ngai tan ta der mai a, a rilru nat thlak hle a ni. Mamawh ngawih ngawih te pawhin “Hei hi min lo kensak hram ta che…” tih an hreh phah bawk a, ruihhlo avangin ruihhlo ni lo bungruate pawhin an tawrh phah a, chu chuan Zo nun ze mawi a chhilh bo mek ta a ni ber mai.
Nakin lawkah chuan ruihhlo hmanga sumdawngte hian mihring ruang te pawh remchangah an la hmang duh zel lovang tih sawi theih a ni ta lo. Ram dang chauha thleng tur anga kan ngaihte hi keimahniah a thleng ve ta zel mai si a, tawng thu chhe lovah, “ruihhlo tawlhrute leh police-te an inkap leh ta” tih chanchinte hi thleng ve thei reng a ni ta.
Tuna kan hriat ang hian, duh reng vang ni miah lovin, “Mi dang thil i kensak mai mai tawh lovang u” tih chu ualau taka mipui inzirtirna tawngkam a chang der tawh a nih hi. Tunhma chuan khawlaia naupang leng vel pawh duh duhin kan tir kual thei a, “Mama, Mami, hei hi Pi Lali/Pu Lala va pe lawk ta che” kan tih chuan an tlan dawr dawr mai thin. Chu chu hnam thisenin a thanhnan tlat, Zo nun ze mawi, hnam dangin an neih ve phak loh a ni. Tunah chuan, “Mami/Mama hei hi…” kan ti dek dek ang a, “Ka duh lo” tih chu chhanna kan hriat tur a ni ta reng mai. “Chu naupang chu a va zak thei lo reuh e…” tih ngawt theih a ni tawh lova, “Ka nu leh paten, mi thil kensak an phal lo…” an tih a ngai tawh; chu chu chhungkuaa an inzirtirna a ni tawh tlat; Ruihhlo vangin.
Ruihhlo do ni te kan hmang thin a, i hmang zel ang u, ni tin kan do a ngai takzet tawh a. Sawrkar pawh hian sawrkar laipui hnenah hian ruihhlo do beihpui thlakna tur hmanrua leh sum leh paite pawh hi tun aia nasa zawk hian nawr chhuah tum se, Mizorama ruihhlo a lo luh hian India ramin a tuar tih a lang reng a, India sawrkar pawhin hei hi a hria a, ruihhlo do nan chuan senso a ui lo tawp ang.