Typhoon Mekkhala-in a ken ruahin Taiwan leh Japan tibuai

Ruah sur nasa lutuk avangin Zirtawpni khan Taiwan chhim lam hmuh zau tak chu che thei lovin a awm a, mi maktaduai nga chuangin hna leh sikul an chawlhsan a, an thenawma Japan chuan tui lian leh lei min inralrinna a tichhuak bawk.
Typhoon Mekkhala thawk mek, tuna a chakna hlohva tropical storm ni mek chuan Japan chhim lama Ryukyu Islands a hnaih hle tawh. Taiwan-ah hian lutve chiah lo mah se a hnaih thliarkar thenkhatah ruah tam tak a thlen a, a bikin chhim lama Kaohsiung, Tainan leh Pingtung-ah te a tam zual.
Mi maktaduai nga chuang awmna, Taiwan bial pathum sorkarte chuan Zirtawpni khan pisa leh sikul chawlh a puang a. Tainan-a tui lian nasa tak avangin hmar leh chhim inpawhna rel kawng lian ber chu khar a ni.
Ruah leh thli na takin Japan hmun zau tak pawh a nuai a, ram chhung hmun hrang hrangah lei min, tui lian leh lui lian inralrinna sang ber tihchhuah a ni a, mi maktaduai 2.2 vel hmun hima chhuak tura tih an ni.
Japanese land ministry chuan thlawhna zin tur 200 chuang thulh a ni a, rel kawng leh expressway tam tak pawh khar a ni a. Toyota chuan Ningani chawhnu khan chhim lama Kyushu-a an factory pakhat chu an khar bawk.
Taiwan-ah chuan thi leh hliam an awm lo va; mahse, Hualien county-a thuneitute chuan tlanga dil chu tui a tam lutuk avangin a hnuaia khaw pahniha mi 200 vel hmun himah an chhuahtir tih an sawi.
Nikum khan Hualien hmun dangah Super Typhoon Ragasa thawh laiin dil tui liamin a kam chim avangin mi 19 thi an lo awm tawh.
Taiwan-ah hian karlehah pawh ruah a sur chhunzawm dawn nia sawi a ni a; mahse, ziaawm deuh tura sawi lawk a ni.