Ruihhlo ngai enkawlna buaipui bul tantu turte an inruahman tan

Ruihhlo ngai enkawlna buaipui
bul tantu turte an inruahman tan
“Core Committee on Hulhliap Short Stay Centre” chu an chairman, Mizoram Youth Commission chairman Malsawmzuala Ralte kaihhruaiin a vawikhatna atan Thawhlehni khan an thukhawm a. Nilaini khan an chetchhuahna hmasa ber atan Synod Revival Camping Centre an tlawh.
He Committee hian ruihhlo ngaiten anmahni enkawlnana an mamawh hmasa, detoxification (ruihhlo atanga thuahfai) leh basic health care (hriselna atana mamawh hmasa) a ngaihtuahpui dawn a, chumi atan chuan sawrkar department leh tlawmngai pawl an tel. Chak zawka an bawhzui theihnan Task Group panga din a ni.
Thutkhawmah hian hmalakna tura sum mamawh a tul anga ngaihtuah tlan nise, an ti a. He hmalakna atana sum leh pai leh thildang tanpuina pe duh tan Committee a inhawng reng tih sawi a ni.
Enkawlna kalpui hun tura ruahman chu ni 15-20 chhung a ni anga, hemi hun chhung hian doctor leh nurse, damdawi leh psychological service mumal taka pek an ni ang. Enkawl hun chhung a zawh hunah chhungkua nena inzawm leh theihna leh Rehabilitation Centre pantir lam ngaihtuahpui an ni ang.
Core Committee hian Nilaini khan Synod Revival Camping Centre an tlawh a. Synod Revival director Rev JC Lalramliana hoin an lo dawngsawng.
Kumin May 26-a Social Welfare minister Larinpuii hoa thutkhawma ngaihtuah, Mizo thalai ruihhlo avanga harsatna tawkte tana hmalak dan tur sawikhawmna atanga he Core Committee hi din a ni a. Member secretary ah Social Welfare director Dr Lalhriatzuali Ralte ruat a ni.