Ruihhlo siamna tawlhrukna thilah Mizo inhnamhnawihte chhui thleng

Ruihhlo tawlhruk avanga an mante sum chetvel dan an chhuina kalzelah Enforcement Directorate chuan ruihhlo siamna atana an hman thin, dan phalna hmanga siam ni si damdawi – pseudoephedrine leh caffeine, dan loa tawlhrukna liantham tak an haichhuak tih an sawi a. An zingah hian Mizoram mi pawh telin, dawr thenkhat thlengin an chhuilut tih an sawi a ni.Directorate of Enforcement (ED) Aizawl Sub Zonal office thuchhuah danin, Mizoram Police-in heroin tawlhruk kg. 4.724 an mana mihring inhnamhnawih an man hote sum chetvel dan an chhuichiannaah Mizorama firm thenkhat leh Gujarat lam firm inthlunzawm dan an chhui thleng a, Gujarat Ahmedabad-a inbun Krishiv Enterprises chuan pseudoephedrine tablet leh caffeine anhydrous chu, kum 2024- 2025 chhung ringawt khan cheng vaibelchhe 4.54 man Mizorama mi thenkhat hnenah an rawn supply a. Hetah hian tunhnaia heroin tawlhruk kaihhnawiha Mizoram Police-in an man Henry Lalbiakzinga bakah Laltluangzela leh Benjamin Lalawmpuia hming a lang. An ni hian an thil tawlhrukah hian hetiang lama dan bawhchhe fo tawh thin tih hriat Abu Saleh Saif Uddin, Assam Karimganj bakah Champhai lam mi Zodinthara leh Lalrampari an hmang tangkai hle tih a sawi a ni.
Sum chetvel dan an chhuinaah hian Aizawla dawr pali – Bill Enterprises, RK Two Sisters Store, LH Pharmacy, KC Pharmacy chu he thila inhnamhnawihna nei an hriat thu leh Kolkata lamah Mahasin Tradecom pawh a inhnamhnawih a ni tih a sawi bawk.
Heng damdawi hi dan hmanga siam, a bikin hritlang lam damdawia tel nia sawi a ni a, ruihhlo – methamphetamine siamchhuahna atana tangkai a ni. Methamphetamine siamna atan pseudoephedrine tablet leh caffeine hi Mizoram kaltlangin dan loa Myanmar lama tawlhluh niin, an thil siamchhuah methamphetamine chu dan lo bawkin Mizoram kaltlangin rawn tawlhlut leh thin tih sawi a ni.
He thila inhnamhnawihte hian Myanmar lama tawlhluhna atan Indian document chu dan loin an hmang tangkai a, Goods & Service Tax thlengin a nghawng tel tih ED hian a sawi.
ED-in a chhui chinah, Karimganj lam mi Abu Saleh Saif Uddin bank account-a cheng vaibelchhe 11 bakah Lalrampari’n Mizoram, Nagaland, West Bengal, Tripura leh Delhi-a a bank account hrang hrangah cheng vaibelchhe 52.8 a dah chu an manchhuak tawh a. Prevention of Money Laundering Act (PMLA) 2002 hnuaiah bank account 21 dang leh heng tarlan takte thil neih hrang hrang chu an khawih chet theih loh tura hren mek a ni.