Ruihhlo tawlhruk dona Ni Mitin huapa do a ngai – CM

June 26 kha khawvel huapa ruihhlo tih leh tawlhruk dona Ni a ni a. Mizoramah pawh hman a ni.
Aizawla hmanpuitu chief minister Lalduhoma chuan ruihhlo tawlhrukna kawngpuiah kan awm avangin keini’n thapui thawhin do mah ila, thenawm ramten an beih ve si loh avangin kan mal tan a, a sawt mawh hle tih a sawi. Ruihhlo supply a tam avangin a man a tlawm a, thalai tam takin a ngawl an vei phah tia sawiin, “Sawrkarna kan chan ve leh a theih ang angin beihpui kan thlak nghal a. Mitin huapa do ngai a nih avangin kohhran hrang hrang leh tlawmngai pawl, ram mipui zawng zawng thawhpuiah kan sawm a ni,” a ti.
Mahni fate ruihhlo laka an him theih nan chhungkua a pawimawh, tiin, “Nu leh paten kan fate thlithlai taima ila, nun kawng dik an zawhna tur a nih phawt chuan khauh taka khuahkhirh hi hreh loang u. Chu chu Pathian pawhin a phal a ni,” Lalduhoma hian a ti.
Social Welfare minister Lalrinpuii chuan kawng dangah nasa takin hma sawn mah ila, a hmang tangkaitu tur mipui, a bikin thangtharte ruihhloin min tihchhiatsak zel chuan a pawi dawn tih a sawi.
Excise & Narcotics minister Lalnghinglova Hmar chuan ruihhlo dona lamah sawrkar chu mipui duh khawp an la phak chiah lo a nih pawhin theihtawp an chhuah a, an bei zel dawn tih a sawi. Ruihhloin min chim nasat avangin kil thum atangin sawrkar, tlawmngai pawl leh kohhran ten thapui thawha do a ngai tih sawiin, Covid hrilengin min chimbuai vanglaia kohhran hmalakna ropui tak tak ang kha ruihhlo do thu ah pawh hmu leh thei ila tih chu a duhthusam a ni thin tih a sawi a ni. LESDE hmalakna hnuaia ruihhlo ngaite enkawl leh an eizawnna khawp thiamna an neih theih nana hmalak an tum dan a sawi bawk.
Inkhawmah hian ruihhlo ngaite enkawlna lama thawh hlawk, Padma Shri pahnih – B Sangkhumi leh Sangthankima te hnenah chawimawina hlan niin, ruihhlo that lohna inzirtirna lam hawi thil hrang hrang tih a ni.
Ruihhlo tih leh tawlhruk dona Ni hi United Nations General Assembly-in 1987 December-a resolution a pass anga khawvel puma hman zui tak a ni a. Kumin thupui chu “Kan dinhmun a chiang e, invenna kawngah tan ila ang u” tih a ni.